இலண்டனில் இயங்கி வரும் ‘சட்னி மேரி’ என்ற இந்திய உணவகம் இந்த ஆண்டின் சிறந்த உணவகம் என்ற விருதைப் பெற்றது. 33 ஆண்டுகள் பழமையான இந்த உணவகம் இங்கிலாந்து பிரதமர் ரிஷி சுனக் உட்பட பல பிரபலங்களின் விருப்பமான உணவகமாக அறியப்படுகிறது.
இங்கிலாந்தில் சிறப்பாகச் செயல்படும் உணவகங்கள், கேளிக்கை விடுதிகள் மற்றும் மசாஜ் சென்டர்கள் உள்ளிட்டவற்றுக்கு ‘ஏஏ விருந்தோம்பல் விருதுகள்’ என்ற பெயரில் விருதுகள் வழங்கப்படுகின்றன. ஒவ்வொரு ஆண்டும் தனியார் அமைப்பால் வழங்கப்படும் இந்த விருது அந்நாட்டின் உயரிய விருதுகளில் ஒன்றாக கருதப்படுகிறது.
அந்த வகையில், இந்த ஆண்டுக்கான விருதுகள் வழங்கும் நிகழ்ச்சி திங்கட்கிழமை நடைபெற்றது. தலைநகர் இலண்டனில் நடைபெற்ற நிகழ்ச்சியில், இலண்டனில் இயங்கி வரும் ‘சட்னி மேரி’ என்ற உணவகத்துக்கு, இந்த ஆண்டின் சிறந்த உணவகம் என்ற விருது வழங்கப்பட்டது.
இந்த உணவகம் 1990-ஆம் ஆண்டு இலண்டனில் உள்ள செல்சியாவில், சகோதரிகள் கேமல்லியா, நமிதா பஞ்சாபி மற்றும் நமிதாவின் கணவர் ரஞ்சித் ஆகியோரால் உருவாக்கப்பட்டது. இதன் கவர்ச்சியான உட்புற வடிவமைப்பு இந்தியாவின் பல்வேறு பகுதிகளின் கலை மரபுகளைப் பிரதிபலிக்கிறது.
இந்த உணவகம் திறமையான சமையல்காரர்களைக் கொண்டு, இந்தியாவின் சுவையான, தற்கால மற்றும் புதுமையான உணவுகளை வழங்குகிறது. மேலும், அற்புதமான விருந்தோம்பல் மற்றும் சிறந்த சேவையை வழங்குகிறது. 33 ஆண்டுகள் பழமையான இந்த உணவகம், இங்கிலாந்து பிரதமர் ரிஷி சுனக் உட்பட பல பிரபலங்களின் விருப்பமான உணவகமாக அறியப்படுகிறது.
