மருந்துகளின் அதிகபட்ச சில்லறை விலைக்கும், கொள்முதல் விலைக்கும் இடையே மிகப்பெரிய வித்தியாசம் இருப்பது ஏன்? – உச்ச நீதிமன்றம் கேள்வி!

மருந்துகளின் அதிகபட்ச சில்லறை விலைக்கும், கொள்முதல் விலைக்கும் இடையே மிகப்பெரிய வித்தியாசம் இருப்பது ஏன் என உச்சநீதிமன்றம் கேள்வி எழுப்பியுள்ளது.

மருந்துகளின் விலை நிர்ணயம் தொடர்பாக தாக்கல் செய்யப்பட்ட இரு மனுக்களை உச்சநீதிமன்றம் விசாரித்து வருகிறது.

இந்த மனுக்கள் நீதிபதிகள் விக்ரம் நாத், சந்தீப் மேத்தா ஆகியோர் அடங்கிய அமர்வில் மீண்டும் விசாரணைக்கு வந்தது.

அப்போது, தேசிய மருந்து விலை நிர்ணய ஆணையத்தின் செயல்பாடுகள் குறித்து நீதிபதிகள் கேள்வி எழுப்பினர்.

புற்றுநோய் மருந்துகளின் வணிக லாப வரம்பை 30 சதவீதமாகக் கட்டுப்படுத்துவது தொடர்பாக மத்திய அரசு அளித்த விளக்கம் திருப்தியளிக்கவில்லை எனக்கூறிய நீதிபதிகள்,
மற்ற மருந்துகளுக்கும் ஏன் இதேபோல் கட்டுப்பாட்டை விதிக்க முடியாது என வினவினர்.

புற்றுநோய்க்கான கீமோதெரபி ஊசி ஒன்றை விநியோகஸ்தர் 11 ஆயிரம் ரூபாய்க்குப் பெற முடியும் எனக் கூறப்பட்ட நிலையில், தனியார் மருத்துவமனை ஒன்று அதற்கு ஒரு லட்சத்து 30 ஆயிரம் ரூபாய் வசூலித்த சம்பவத்தையும் நீதிபதிகள் சுட்டிக்காட்டினர்.

மருந்துகளின் விலையை 100 முதல் 200 சதவீதம் வரை உயர்த்தி வசூலிப்பதை ஏற்க முடியாது எனத் தெரிவித்த நீதிபதிகள், மருந்துகளின் விலை வேறுபாட்டுக்கு யார் பொறுப்பேற்பது என கேள்வி எழுப்பினர்.

இதற்கிடையே, உலகிலேயே இந்தியாவில்தான் மருந்துகள் குறைந்த விலையில் விற்கப்படுவதாக மத்திய அரசு தரப்பில் தெரிவிக்கப்பட்டது. இதனை அடுத்து, வழக்கின் விசாரணையை நீதிபதிகள் ஒத்திவைத்து உத்தரவிட்டனர்.