தமிழகத்தில் அதிக மின் கட்டணம் விதிக்கப்படுவது குறித்து விசாரிக்க குழு அமைக்கக் கோரி சென்னை உயர்நீதிமன்றத்தில் வழக்கு தாக்கல் செய்யப்பட்டுள்ளது.
சென்னை திருவேற்காட்டைச் சேர்ந்த காமேஷ் என்பவர் இந்த மனுவை தாக்கல் செய்துள்ளார்.
தமிழகத்தில் தவெக அரசு பொறுப்பேற்ற பின், 100 யூனிட் இலவச மின்சாரத்தை, 200 யூனிட்டாக உயர்த்தி உத்தரவு பிறப்பிக்கப்பட்டதாகக் கூறியுள்ளார்.
இந்த உத்தரவு பிறப்பித்த பின், கடந்த ஒன்றரை மாதங்களாக மின் கட்டணம், முந்தைய பில்லை விட மூன்று மடங்கு வரை அதிகரித்துள்ளதாக மனுவில் குறிப்பிட்டுள்ளார்.
இதுதொடர்பாக ஒன்றரை லட்சம் பேர் புகார் அளித்தும், மின்சார வாரியம் எந்த நடவடிக்கையும் எடுக்கவில்லை என குற்றம்சாட்டியுள்ளார்.
இதனால், பொதுமக்கள் பெரிதும் பாதிக்கப்பட்டுள்ளதாக வேதனை தெரிவித்துள்ள மனுதாரர்,மின் கட்டணம் விதிப்பதில் உள்ள இந்த குறைபாடுகளை கண்டறிந்து சரிசெய்ய குழு அமைக்க உத்தரவிட வேண்டும் என மனுவில் கோரியுள்ளார்.
இந்த மனுவை விசாரித்த நீதிபதி பி.டி.ஆஷா, பொதுநல வழக்காக உள்ளதாகக் கூறி, மனுவை தலைமை நீதிபதி அமர்வில் பட்டியலிட பரிந்துரைத்துள்ளார்.
