வயது மூப்பு காரணமாக, வேளாண் விஞ்ஞானியான எம்.எஸ்.சுவாமிநாதன், தனது 98-வது வயதில் சென்னையில் இன்று காலை 11.20 மணியளவில் காலமானார். அவரது மறைவுக்கு பாரதப் பிரதமர் நரேந்திர மோடி, தமிழக ஆளுநர் ஆர்.என்.ரவி ஆகியோர் இரங்கல் தெரிவித்திருக்கிறார்கள்.
தமிழகத்தின் தஞ்சாவூர் மாவட்டம் கும்பகோணத்தில் 1925-ம் ஆண்டு ஆகஸ்ட் 7-ம் தேதி பிறந்தார் எம்.எஸ். சுவாமிநாதன். இவரது இயற்பெயர் மான்கொம்பு சாம்பசிவம் சுவாமிநாதன் என்பதாகும். கும்பகோணத்தில் பள்ளிப் படிப்பை முடித்த இவர், பல்வேறு கல்லூரிகளில் உயர்கல்வி பயின்றார். பின்னர், கேம்ப்ரிட்ஜ் பல்கலைக்கழகத்தில் முனைவர் பட்டம் பெற்றார். பின்னர், கேம்ப்ரிட்ஜில் தன்னுடன் படித்த மீனா என்பவரை மணந்தார்.
இத்தம்பதிக்கு சௌமியா சுவாமிநாதன் (குழந்தை மருத்துவர்), மதுரா சுவாமிநாதன் (பொருளாதார நிபுணர்), மற்றும் நித்யா சுவாமிநாதன் (பாலினம் மற்றும் கிராமப்புற மேம்பாடு) என 3 மகள்கள் உள்ளனர். இந்தியாவின் பசுமைப் புரட்சியை முன்னின்று நடத்திய எம்.எஸ்.சுவாமிநாதன், சர்வதேச அளவில் புகழ் பெற்றார். பசுமைப் புரட்சியின் தந்தை என போற்றப்படும் இவர், சூழலியல் பொருளாதாரத்தின் தந்தை என்று ஐக்கிய நாடுகள் சபையால் பாராட்டப்பட்டவர்.
இவரது மறைவுக்கு பாரதப் பிரதமர் நரேந்திர மோடி, தமிழக ஆளுநர் ஆர்.என்.ரவி ஆகியோர் இரங்கல் தெரிவித்திருக்கின்றனர். இதுகுறித்து பிரதமர் மோடி தனது எக்ஸ் பக்கத்தில் வெளியிட்டிருக்கும் இரங்கல் பதிவில், “டாக்டர் எம்.எஸ்.சுவாமிநாதனின் மறைவிற்கு ஆழ்ந்த இரங்கல். நமது தேசத்தின் வரலாற்றில் மிக முக்கியமான காலக்கட்டத்தில், விவசாயத்தில் அவர் செய்த திருப்புமுனையான பணி லட்சக்கணக்கான மக்களின் வாழ்க்கையை மாற்றியது. மேலும், நமது தேசத்திற்கு உணவுப் பாதுகாப்பை உறுதி செய்தது. விவசாயத்தில் அவர் ஆற்றிய புரட்சிகரப் பங்களிப்புகளுக்கு அப்பால், டாக்டர் சுவாமிநாதன் புதுமையின் ஆற்றல் மையமாகவும், பலருக்கு வழிகாட்டியாகவும் இருந்தார்.
ஆராய்ச்சி மற்றும் வழிகாட்டுதலுக்கான அவரது அசைக்க முடியாத அர்ப்பணிப்பு, எண்ணற்ற விஞ்ஞானிகள் மற்றும் கண்டுபிடிப்பாளர்களின் மீது அழியாத முத்திரையைப் பதித்திருக்கிறது. டாக்டர் சுவாமிநாதனுடனான எனது உரையாடல்களை நான் எப்போதும் போற்றி மகிழ்வேன். இந்தியா முன்னேற்றம் காண வேண்டும் என்ற அவரது ஆர்வம் முன்மாதிரியாக இருந்தது. அவரது வாழ்க்கையும் பணியும் வரும் தலைமுறைகளுக்கு உத்வேகம் அளிக்கும். அவரது குடும்பத்தினருக்கும், பின் தொடர்பாளர்களுக்கும் இரங்கல்கள். ஓம் சாந்தி!” என்று தெரிவித்திருக்கிறார்.
Deeply saddened by the demise of Dr. MS Swaminathan Ji. At a very critical period in our nation’s history, his groundbreaking work in agriculture transformed the lives of millions and ensured food security for our nation. pic.twitter.com/BjLxHtAjC4
— Narendra Modi (@narendramodi) September 28, 2023
அதேபோல, தமிழக அளுநர் ஆர்.என்.ரவி, தனது எக்ஸ் பக்கத்தில் வெளியிட்டிருக்கும் இரங்கல் பதிவில், “பசுமைப் புரட்சியின் தந்தையும் நவீன பாரதத்தை உருவாக்கியவருமான டாக்டர் எம்.எஸ்.சுவாமிநாதனின் மறைவுக்கு ஆழ்ந்த இரங்கல். அவர் எப்போதும் நம் இதயங்களிலும் மனதிலும் வாழ்வார். துயரமான இந்த நேரத்தில் அவரது குடும்பத்தினர் மற்றும் நண்பர்களுக்கு எனது ஆதரவை தெரிவிக்கிறேன். ஓம் சாந்தி!” என்று குறிப்பிட்டிருக்கிறார்.
