கேரள வனப்பகுதியில் இறந்து கிடந்த காட்டு பன்றியின் மாதிரிகளில், வைரஸ் பாதிப்பு இருப்பது உறுதி செய்யப்பட்டுள்ளது.
கடந்த மாதம் கேரளாவில் நிபா வைரஸ் தொற்று பாதிப்பு காரணமாக, 2 பேர் உயிரிழந்த சம்பவம் பரபரப்பை ஏற்படுத்தியது. இதை அடுத்து கேரளாவில் மேற்கொள்ளப்பட்ட நோய்த்தடுப்பு பணிகள் காரணமாக, நிபா வைரஸ் பாதிப்பு கட்டுக்குள் கொண்டு வரப்பட்டது.
இந்த நிலையில், கேரள மாநிலம் கோழிக்கோட்டில் ஆப்பிரிக்க பன்றிக் காய்ச்சல் வைரஸ் பாதிப்பு கண்டுப்பிடிக்கப்பட்டுள்ளது.
கோழிக்கோடு மாவட்டத்தில் உள்ள ஜானகி வனப்பகுதியில் காட்டுப் பன்றி இறந்து கிடந்தது. இந்த பன்றி இறந்ததற்கான காரணம் குறித்து அறிய பன்றியின் மாதிரிகள் போபாலில் உள்ள ஆய்வகத்துக்கு அனுப்பப்பட்டது. ஆய்வு செய்ததில், அந்த பன்றிக்கு ஆப்பிரிக்க பன்றிக்காய்ச்சல் வைரஸ் இருப்பது உறுதி செய்யப்பட்டது.
ஆப்பிரிக்க பன்றிக் காய்ச்சல் பரவினால், தொற்று பாதித்த பகுதிக்கு ஒரு கிலோ மீட்டர் சுற்றளவில் இருக்கும் பன்றிகளைக் கொல்ல வேண்டும். ஆனால் தற்போது காட்டுப்பன்றி இறந்து கிடந்த ஜானகி வனப் பகுதிக்கு ஒரு கிலோ மீட்டர் சுற்றளவுக்கு எந்த பன்றி பண்ணைகளும் இல்லை. இதனால் அந்த பகுதியில் வேறு பன்றிகளை அழிக்க வேண்டிய சூழல் ஏற்படவில்லை என்று சுகாதாரத்துறையினர் தெரிவித்துள்ளனர்.
இதுகுறித்து கோழிக்கோடு மாவட்டத்தில் உள்ள பன்றி பண்ணைகளுக்குப் பாதுகாப்பு வழிகாட்டு நெறிமுறைகளை சுகாதாரத்துறை வழங்கியுள்ளது. மேலும், பன்றி பண்ணை உரிமையாளர்களுக்கு ஆப்பிரிக்க பன்றிக் காய்ச்சல் வைரஸ் குறித்து விழிப்புணர்வு ஏற்படுத்தப்பட்டு வருகிறது.
ஆப்பிரிக்க பன்றி காய்ச்சல் வைரஸ் மனிதர்களுக்குப் பரவாது என்று கூறியுள்ள சுகாதாரத்துறை, அதுகுறித்து மக்கள் அச்சப்பட வேண்டாம் என்று தெரிவித்திருக்கிறது.
