சென்னை செம்பரம்பாக்கம் ஏரியிலிருந்து உபரி நீர் திறக்கப்படுவதையொட்டி, கரையோர மக்களுக்கு எச்சரிக்கை விடுக்கப்பட்டுள்ளது.
சென்னையின் குடிநீர் வழங்கும் முக்கிய நீர் ஆதாரங்களில் ஒன்று செம்பரம்பாக்கம் ஏரி. இந்த ஏரியானது காஞ்சிபுரம் மாவட்டம் குன்றத்தூர் வட்டத்தில் 25.51 சதுர கி.மீ பரப்பளவில் அமைந்துள்ளது. ஏரியின் நீர் மட்டத்தின் மொத்த உயரம் 24.00 அடியாகும். இதன் முழு கொள்ளளவு 3645 மில்லியன் கன அடியாகும். நேற்று (07.10.2023) நீர் இருப்பு 21.96 அடியாகவும், கொள்ளளவு 3110 மில்லியன் கன அடியாகவும் இருந்தது.
செம்பரம்பாக்கம் ஏரியின் நீர் வரத்து விநாடிக்கு 231 கன அடியாக உள்ளது. தற்போது ஏரிக்கு வரும் நீர் வரத்தினால் 22 அடியை எட்டும் நிலையில் உள்ளது. மேலும், ஏரியின் நீர் பிடிப்பு பகுதிகளில் அவ்வப்போது விட்டுவிட்டு மழை பெய்து வருவதால், செம்பரம்பாக்கம் ஏரியின் நீர் மட்டம் மளமளவென உயர்ந்து வருகிறது.
இதனால், சென்னை செம்பரம்பாக்கம் ஏரியில் இன்று தண்ணீர் திறக்கப்பட உள்ளது. இந்த நிலையில், கரையோர மக்களுக்கு வெள்ள அபாய எச்சரிக்கை விடுக்கப்பட்டுள்ளது. இது தொடர்பாக காஞ்சிபுரம் மாவட்ட ஆட்சித் தலைவர் வெளியிடப்பட்டுள்ள அறிக்கையில், செம்பரம்பாக்கம் ஏரியில் இன்று காலை 10 மணி முதல் விநாடிக்கு வெள்ளநீர் போக்கி வழியாக, 100 கன அடி உபரி நீர் வெளியேற்றப்படுகிறது.
இதன் காரணமாக சிறு களத்தூர், காவலர், குன்றத்தூர், திருமுடிவாக்கம், வழுதியம்பேடு, திருநீர்மலை மற்றும் அடையாறு ஆற்றின் கரையின் இரு புறமும் உள்ள தாழ்வான பகுதிகளில் வசிப்பவர்களை எச்சரிக்கையாக இருக்குமாறு மாவட்ட ஆட்சித் தலைவர் கலைச்செல்வி மோகன் எச்சரிக்கை விடுத்துள்ளார்.
முன்னதாக, காஞ்சிபுரம் மாநகராட்சிக்கு உட்பட்ட தாமல் ஏரியை, மாவட்ட ஆட்சித் தலைவர் கலைச்செல்வி மோகன் மற்றும் மாநகராட்சி ஆணையர் கண்ணன் ஆகியோர் நேரில் சென்று பார்வையிட்டு ஆய்வு செய்தனர்.
