சென்னைக்கு முக்கிய குடிநீர் ஆதரமாக இருக்கும் ஏரிகளின் நீர்மட்டம் உயர்ந்து வருகிறது. சென்னைக்கு தட்டுப்பாடின்றி 9 மாதத்துக்கு குடிநீர் வழங்க முடியும் என்று அதிகாரிகள் தெரிவித்துள்ளனர்.
கடந்த சில நாட்களாக பெய்த கனமழையின் காரணமாக, பூண்டி, செம்பரம்பாக்கம் ஏரிகளுக்கு வரும் நீரின் அளவு அதிகரித்துள்ளது. அந்த வகையில், 35 அடி உயரம் கொண்ட பூண்டி ஏரியின் நீர்மட்டம் 34 அடியை எட்டியுள்ளது. இதேபோல் 24 அடி உயரம் கொண்ட செம்பரம்பாக்கம் ஏரியின் நீர்மட்டம் கடந்த 22 அடியாக உள்ளது. இதைத்தொடர்ந்து பூண்டி, செம்பரம்பாக்கம் ஏரிகளிலிருந்து உபரி நீர் திறந்து விடப்பட்டது.
பூண்டி, புழல், செம்பரம்பாக்கம், சோழவரம், கண்ணன்கோட்டை ஆகிய 5 ஏரிகளும் சென்னைக்கு முக்கிய குடிநீர் ஆதாரமாக உள்ளது. இந்த 5 ஏரிகளிலும் மொத்தம் 11 ஆயிரத்து 757 மில்லியன் கனஅடி தண்ணீர் சேமித்து வைக்கலாம். இன்று காலை நிலவரப்படி குடிநீர் வழங்கும் 5 ஏரிகளிலும் மொத்தம் 9,817 மில்லியன் கனஅடி தண்ணீர் உள்ளது.
இந்த தண்ணீரை சென்னை குடிநீருக்கு தட்டுப்பாடின்றி 9 மாதத்துக்கு வழங்க செய்யமுடியும். பருவமழை தொடங்குவதற்கு முன்பே குடிநீர் ஏரிகளில் போதுமான அளவு தண்ணீர் இருப்பதால், அடுத்த ஆண்டு சென்னையில் குடிநீர் தட்டுப்பாடு வர வாய்ப்பு இல்லை என்று அதிகாரிகள் கூறியுள்ளனர்.
சோழவரம் ஏரியில் மட்டும் 50 சதவீதத்துக்கு கீழ் தண்ணீர் உள்ளது. கண்ணன்கோட்டை தேர்வாய் கண்டிகை ஏரி 96 சதவீதம் நிரம்பி இருப்பது குறிப்பிடத்தக்கது.
3,300 மி.கன அடி கொள்ளளவு கொண்ட புழல் ஏரியின் நீர்மட்டம் 2430 மி.கன அடியாக உள்ளது. 189 கன அடி தண்ணீர் குடிநீர் தேவைக்காக வெளியேற்றப்படுகிறது. இதேபோல் 1,081 மி.கனஅடி கொள்ளளவு கொண்ட சோழவரம் ஏரியின் நீர்மட்டம் 498 மி.கன அடியாக உள்ளது.
செம்பரம்பாக்கம் ஏரியின் மொத்த கொள்ளளவான 3,645 மி.கன அடியில் 3,123 மி.கனஅடி தண்ணீர் இருப்பு உள்ளது. ஏரிக்கு 156 கனஅடி தண்ணீர் வந்து கொண்டு இருக்கிறது. உபரி நீராக 100 கனஅடியும், குடிநீர் தேவைக்காக 237 கனஅடியும் வெளியேற்றப்படுகிறது.
