இந்தியாவில் 3 மாதங்களில் சுமார் 20 லட்சம் யூடியூப் வீடியேக்கள் நீக்கப்பட்டுள்ளதாக கூகுள் நிறுவனம் தெரிவித்துள்ளது.
யூடியூப் இல் நாள்தோறும் ஏராளமான வீடியோக்கள் அப்லோடு செய்யப்படுகின்றன. இந்நிலையில் விதிகளை பின்பற்றாத வீடியோக்கள் அவ்வப்போது கூகுள் நிறுவனம் நீக்கம் செய்து வருகிறது. அதாவது உண்மைக்குப் புறம்பான தகவல்களை கொண்ட மற்றும் கொள்கை வழிகாட்டுதலின் படி பதிவேற்றம் செய்யப்படாத, விதிகளை மீறிய வீடியோக்கள் நீக்கம் செய்யப்படுகின்றன.
அவ்வாறு இந்தியாவில் நடப்பு ஆண்டு ஏப்ரல், மே, ஜூன் ஆகிய 3 மாதங்களில் விதிகளை மீறிய சுமார் 20 லட்சம் வீடியோக்கள் நீக்கம் செய்யப்பட்டுள்ளதாக கூகுள் நிறுவனம் தெரிவித்துள்ளது.
டெல்லியில் நடைபெற்ற கூகுள் ஃபார் இந்தியா 2023 நிகழ்வின்போது பேசிய யூடியூப் இந்தியாவுக்கான அரசு விவகாரங்கள் மற்றும் பொதுக் கொள்கைத் தலைவரான மீரா சாட், யூடியூப் விதிகளை மீறும் வகையில் பதிவேற்றம் செய்யப்பட்ட 20 லட்சம் வீடியோக்களை நீக்கப்பட்டுள்ளதாக தெரிவித்தார். நீக்கப்பட்ட பெரும்பாலான வீடியோக்கள் 10-க்கும் குறைவான பார்வைகளை மட்டுமே கொண்டிருந்ததாகவும் அவர் குறிப்பிட்டுள்ளார்.
மேலும், யூடியூபின் தரத்தை மேம்படுத்தும் ஒரு பகுதியாக வரும் காலங்களில் இந்தியாவில் ‘வாட்ச் பேஜ்’ என்ற புதிய அம்சத்தை யூடியூபில் அறிமுகப்படுத்த இருப்பதாகவும், இந்த அம்சம் பயனர்களுக்கு நம்பகமான செய்திகளை மட்டுமே பரிந்துரைக்கும் என்றும் மீரா சாட் தெரிவித்துள்ளார்.