ஒரு நாள் உலகக்கோப்பை கிரிக்கெட் தொடரில் சென்னையில் நடைபெறும் கடைசிப் போட்டி.
ஒரு நாள் உலகக்கோப்பை கிரிக்கெட் தொடர் இந்தியாவில் நடைபெற்று வருகிறது. இதில் இன்றையப் போட்டி சென்னையில் பாகிஸ்தான் மற்றும் தென்னாப்பிரிக்கா அணிகளுக்கிடையே நடைபெறுகிறது.
பாகிஸ்தான் அணியை பொறுத்தவரை நடப்பு தொடரில் முதல் இரண்டு ஆட்டங்களில் நெதர்லாந்து மற்றும் இலங்கை அணியை தோற்கடித்து கம்பீரமாக தொடங்கியது. ஆனால் அடுத்ததாக இந்தியா, ஆஸ்திரேலியா, ஆப்கானிஸ்தான் அணிகளிடம் தோற்று பரிதாபமான நிலைக்கு தள்ளப்பட்டுள்ளது.
குறிப்பாக கத்துக்குட்டி அணியாக கருதப்பட்ட ஆப்கானிஸ்தான் அணியிடன் படுதோல்வி அடைந்தது அந்த அணியை கடும் நெருக்கடியில் ஆழ்த்தியுள்ளது. எஞ்சியுள்ள 4 போட்டிகளில் வெற்றி பெற்றால் மட்டுமே அரையிறுதி சுற்று பற்றி நினைத்து பார்க்க முடியும். அதனால் இப்போட்டியில் பாகிஸ்தான் வெற்றி பெற வேண்டிய கட்டாயத்தில் உள்ளது.
பாகிஸ்தான் அணியின் பேட்டிங் பலமாக இருந்த போதிலும், மோசமான சுழற்பந்து வீச்சு மற்றும் பீல்டிங் ஆகியவை பாகிஸ்தானுக்கு பின்னடைவாக அமைந்துள்ளது. ஆப்கானிஸ்தான் அணிக்கெதிரான ஆட்டமும் சென்னை மைதானத்தில் தான் நடைபெற்றது என்பதால் ஓரளவு மைதானம் பற்றிய கணிப்பை கொண்டு இன்றைய ஆட்டத்தில் பாகிஸ்தான் அணி வெற்றி பெற போராடும் என்பதில் எந்த சந்தேகமுமில்லை.
உலகக்கோப்பை தொடரில் யாரும் எதிர்பாராத வகையில் தென்னாப்பிரிக்கா அணி அசுர வளர்ச்சி பெற்றுள்ளது. அந்த அணி நெதர்லாந்து எதிரான ஆட்டத்தில் மட்டும் தோல்வியை தழுவியது, ஆனால் இலங்கை, வங்கதேசம், ஆஸ்திரேலியா, இங்கிலாந்து ஆகிய 4 அணிகளை வீழ்த்தி பலம் வாய்ந்த அணிகளில் ஒன்றாக உள்ளது.
நிச்சயம் அரையிறுதிக்கும் அந்த அணி செல்லும் என கிரிக்கெட் வல்லுநர்கள் கணித்துள்ளனர். விளையாடிய 5 போட்டிகளில் 4 போட்டிகள் 300 ரன்களுக்கு மேல் குவித்து மலைக்க வைத்துள்ளனர். பேட்டிங், பந்துவீச்சு இரண்டிலும் வலுவாக உள்ள தென்னாப்பிரிக்காவை பாகிஸ்தான் சமாளிப்பது சற்று கடினம் என்பதால் இப்போட்டி கண்டிப்பாக விறுவிறுப்பு நிறைந்ததாக இருக்கும் என்பது நிதர்சனம்.
பாகிஸ்தானுக்கு எதிராக உலகக் கோப்பை போட்டிகளில் தென் ஆப்பரிக்கா அணி தான் அதிக முறை வென்றிருந்தாலும், கடைசி வெற்றியானது 1999இல் நடந்துள்ளது. இதன் பின்னர் மோதிய இரண்டு முறையும் தோல்வியை தழுவியுள்ளது. எனவே நல்ல பார்மில் இருக்கும் தென் ஆப்பரிக்கா வெற்றி பாதைக்கு திரும்ப முயற்சிக்கும்.
மேலும் வெற்றி வாய்ப்பு கணக்கெடுப்பில் தென் ஆப்பிரிக்கா அணி 62% வெற்றி பெறும் என்றும் பாகிஸ்தான் அணி 38% வெற்றி பெறும் என்று இணையத்தில் பதிவிட்டுள்ளது.
