சமஸ்கிருதம் என்பது பாரம்பரியத்தின் மொழி மட்டுமல்ல, நமது முன்னேற்றம் மற்றும் அடையாளத்தின் மொழி. பல மொழிகளுக்கு தாய் மொழி என்று பாரதப் பிரதமர் நரேந்திர மோடி கூறியிருக்கிறார்.
மத்தியப் பிரதேச மாநிலத்திற்குச் சென்றிருக்கும் பாரதப் பிரதமர் நரேந்திர மோடி, சித்ரகூடில் உள்ள காஞ்ச் மந்திரில் பிரார்த்தனை செய்தார். பின்னர், துளசி பீடத்தில் இன்று நடந்த நிகழ்ச்சியில் உரையாற்றிய பிரதமர் மோடி, “இத்தனை ஆயிரம் ஆண்டுகளில் உலகில் எத்தனையோ மொழிகள் தோன்றி மறைந்திருக்கின்றன. பழைய மொழிகளுக்குப் பதிலாக புதிய மொழிகள் வந்திருக்கின்றன. ஆனால், நமது கலாச்சாரம் இன்னும் அப்படியே உள்ளது. சமஸ்கிருதம் காலப்போக்கில் செம்மையடைந்ததே தவிர, மாசுபடவில்லை.
ஆயிரம் ஆண்டுகால அடிமைத்தனத்தில் இந்தியாவை அழிக்கப் பல முயற்சிகள் மேற்கொள்ளப்பட்டன. சமஸ்கிருத மொழியை முற்றிலுமாக அழிக்க முயற்சிகள் மேற்கொள்ளப்பட்டன. சுதந்திரம் பெற்றோம், ஆனால் அடிமை மனப்பான்மை கொண்டவர்கள் சமஸ்கிருதத்தைப் பற்றி ஒரு பக்கச்சார்பான கருத்தைக் கொண்டிருந்தனர். மக்கள் தங்கள் தாய்மொழியை அறிந்தால், மற்ற நாடுகள் அதைப் பாராட்டுவார்கள். ஆனால் அவர்கள் சமஸ்கிருத மொழியைப் பின்தங்கியதன் அடையாளமாகக் கருதுகிறார்கள்.
இவ்வாறான மனநிலை கொண்டவர்கள் கடந்த ஆயிரம் வருடங்களாக வெற்றியடையவில்லை. எதிர்காலத்திலும் வெற்றியடைய மாட்டார்கள். இன்று பல ராமர் கோவில்களில் பிரார்த்தனை செய்வதை பாக்கியமாக உணர்கிறேன். ஜகத்குரு ராமானந்தாச்சார்யாவின் ஆசீர்வாதத்தையும் நான் நாடினேன். சித்ரகூடம் எனக்கு எப்போதும் உத்வேகம் அளிக்கிறது” என்றார்.
சித்ரகூடில் உள்ள காஞ்ச் மந்திர் 3 சிகரங்கள் கொண்ட கோவில். இக்கோவிலின் கருவறையில் இராமர், சீதை மற்றும் லட்சுமணன் ஆகியோரின் அழகான சிலைகள் வைக்கப்பட்டுள்ளன. இது ஒவ்வொரு நாளும் ஒரு பூசாரி மூலம் சேவை செய்யப்படுகிறது. ஸ்ரீதுளசி பீத் சேவா நியாஸ் என்பது மத்தியப் பிரதேசத்தின் சித்ரகூடில் உள்ள ஜான்கி குந்த் என்ற இடத்தில் உள்ள ஒரு மத மற்றும் சமூக சேவை நிறுவனமாகும்.
1987-ம் ஆண்டு துளசி ஜெயந்தி தினத்தன்று குருஜியால் இந்த நிறுவனம் நிறுவப்பட்டது. துளசி பீடம் இந்தியாவிலும் உலகிலும் இந்து மதக் கருப்பொருள்கள் பற்றிய இலக்கியங்களை வெளியிடும் முன்னணி நிறுவனங்களில் ஒன்று என்பது குறிப்பிடத்தக்கது.
