ஹமாஸ் தீவிரவாதிகளால் தாக்கப்பட்டு, பிணைக் கைதியாக பிடித்துச் செல்லப்பட்ட 22 வயதான ஜெர்மனி பெண் ஷானி லவுக் உயிரிழந்து விட்டதாகவும், அவரது மண்டை ஓடு கண்டுபிடிக்கப்பட்டிருப்பதாகவும் இஸ்ரேல் இராணுவம் தெரிவித்திருக்கிறது.
இஸ்ரேல் மீது கடந்த 7-ம் தேதி ஹமாஸ் தீவிரவாதிகள் ஏவுகணைத் தாக்குதல் நடத்தினர். மேலும், இஸ்ரேலுக்குள் ஊடுருவி நேரடித் தாக்குதலிலும் ஈடுபட்டனர். அப்போது, இஸ்ரேலின் ரைம் பகுதியில் நடந்த சூப்பர் நோவா இசை விழாவிலும் ஹமாஸ் தீவிரவாதிகள் புகுந்து கண்மூடித்தனமாக துப்பாக்கியால் சுட்டனர்.
இத்தாக்குதலில், இசை விழாவில் பங்கேற்ற 260 பேர் கொல்லப்பட்டனர். மேலும், விழாவில் பங்கேற்ற பலரையும் ஹமாஸ் தீவிரவாதிகள் கடத்திச் சென்றனர். அந்த வகையில், இந்த இசை விழாவில் பங்கேற்ற ஜெர்மனியைச் சேர்ந்த 22 வயதான ஷானி லவுக் என்கிற இளம் பெண்ணையும் ஹமாஸ் தீவிரவாதிகள் கடத்திச் சென்றனர்.
அப்போது, அப்பெண்ணை கொடூரமாகத் தாக்கியவர்கள், அவரது ஆடைகளைக் களைந்து ஜீப்பின் பின்பகுதியில் வைத்து தெருத் தெருவாக ஊர்வலமாகக் கொண்டு சென்றனர். இந்த வீடியோ சமூக வலைதளங்களில் வெளியாகி உலகம் முழுவதும் கடும் அதிர்ச்சியையும், பெரும் அதிர்வலைகளையும் ஏற்படுத்தியது.
இதைக் கண்ட ஷானி லவுக்கின் தாய் ரிகார்டா, தனது மகளை விடுவிக்குமாறு பாலஸ்தீன மக்களிடம் சமூக வலைத்தளங்கள் மூலம் உருக்கமாக வேண்டுகோளை விடுத்தார். அப்போது, பாலஸ்தீனம் தரப்பில் அளிக்கப்பட்ட விளக்கத்தில், காஸாவில் உள்ள மருத்துவமனையில் ஆபத்தான நிலையில் ஷானி லவுக் சிகிச்சை பெற்று வருவதாகத் தெரிவிக்கப்பட்டது.
ஆனால், இத்தகவல் பொய் என்பது தற்போது தெரியவந்திருக்கிறது. காரணம், இஸ்ரேல் இராணுவ வீரர்கள் சமீபத்தில் ஒரு மண்டை ஓட்டை கண்டெடுத்திருக்கிறார்கள். அந்த மண்டை ஓட்டை மரபணு பரிசோதனை செய்தபோது, அது ஷானி லவுக்கின் மண்டை ஓடு என்பது தெரியவந்திருக்கிறது. இதையடுத்து, ஷானி லவுக் இறந்து விட்டதாக இஸ்ரேல் இராணுவம் அதிகாரப்பூர்வமாக அறிவித்திருக்கிறது.
மேலும், இத்தகவலை ஷானியின் உறவினர்களும் உறுதி செய்திருக்கிறார்கள். இதுகுறித்து ஷானி லவுக்கின் தாய் ரிகார்டா கூறுகையில், “எனது மகள் ஷானி உயிரிழந்து விட் டதாக இஸ்ரேல் வெளியுறவுத்துறை அதிகாரிகள் தெரிவித்தனர். இது மிகவும் துயரமான செய்தி. அவளது இழப்பை தாங்கிக் கொள்ள முடியவில்லை” என்று தெரி வித்திருக்கிறார்.
அதேபோல, அவரது உறவினர்கள் கூறுகையில், “ஷானி உயிரிழந்து விட்டது உறுதியாகி இருக்கிறது. அதேசமயம், அவரது ஆண் நண்பரைக் காணவில்லை. அனேகமாக அவர் ஹமாஸ் தீவிரவாதிகளிடம் சிக்கி இருக்கலாம்” என்று தெரிவித்திருக்கிறார்கள்.
