தமிழக பா.ஜ.க. விளையாட்டு மேம்பாட்டுப் பிரிவு மாநில தலைவர் அமர் பிரசாத் ரெட்டிக்கு மேலும் ஒரு வழக்கில் ஜாமீன் கிடைத்துள்ளது.
சென்னை கிழக்குக் கடற்கரைச் சாலை பனையூரில் உள்ள தமிழக பா.ஜ.க. தலைவர் அண்ணாமலையின் வீட்டின் முன்புறம் இருந்த பாஜக கொடிக்கம்பத்தைக் கடந்த 21-ம் தேதி சென்னை மாநகராட்சி ஊழியர்கள் அகற்றிய போது, காவல்துறையினருக்கும் பாஜக தொண்டர்களுக்கு இடையே வாக்குவாதம் ஏற்பட்டது.
இதில், ஜேசிபி வாகனத்தைச் சேதப்படுத்தியதாகக் கூறி, தமிழக பா.ஜ.க. விளையாட்டு மேம்பாட்டுப் பிரிவு மாநில தலைவர் அமர் பிரசாத் ரெட்டி உள்ளிட்ட 6 பேரை கானாத்தூர் காவல்துறையினர் கைது செய்து புழல் சிறையில் அடைத்தனர். மேலும் 2 வழக்குகளில் போலீசார் அமர் பிரசாத் ரெட்டியைக் கைது செய்துள்ளனர்.
செஸ் ஒலிம்பியாட் தொடக்க விழாவின்போது வைக்கப்பட்டிருந்த முதல்வர் படத்தை அகற்றியதாக கோட்டூர்புரம் போலீசார் வழக்குப் பதிவு செய்து கைது செய்தனர்.
அதேபோல, வள்ளுவர் கோட்டம் முன்பு பாஜக நடத்திய போராட்டத்தில் போக்குவரத்து காவல் உதவி ஆய்வாளரிடம் தகராறு செய்ததாக, நுங்கம்பாக்கம் போலீசார் வழக்குப் பதிவு செய்துள்ளனர். இதில் ஒரு வழக்கில் நவம்பர் 10 -ம் தேதி வரை அமர் பிரசாத்துக்கு நீதிமன்றக் காவல் விதிக்கப்பட்டுள்ளது.
ஏற்கனவே, ஒரு வழக்கில் அமர் பிரசாத் ரெட்டி-க்கு ஜாமீன் வழங்கப்பட்டுள்ளது. இந்த நிலையில், மற்றொரு வழக்கில், தமிழக பாஜக இளைஞர் மற்றும் விளையாட்டுப்பிரிவு தலைவர் அமர் பிரசாத் ரெட்டி உள்ளிட்ட 4 பேருக்கு நவம்பர் 3 -ம் தேதி வரை ஆலந்தூர் நீதிமன்றம் காவல் நீட்டிப்பு செய்துள்ளது.
இந்த நிலையில், தென்காசி மாவட்டம் ஆழ்வார்குறிச்சியில் அண்ணாமலை நடைப் பயணத்தின்போது, போலீஸாரை பணி செய்ய விடாமல் தடுத்த வழக்கில் பாஜக நிர்வாகி அமர்பிரசாத் ரெட்டிக்கு ஜாமீன் வழங்கி அம்பாசமுத்திரம் நீதிமன்றம் உத்தரவிட்டுள்ளது.
இதனிடையே, செஸ் ஒலிம்பியாட் தொடக்க விழாவில் முதலமைச்சர் படத்தின் மீது பிரதமர் படத்தை ஒட்டிய வழக்கில் ஜாமீன் கோரிய மனு நாளை ஒத்திவைக்கப்பட்டுள்ளது குறிப்பிடத்தக்கது.
