ரஷிய பெண்கள் 8-க்கும் அதிகமான குழந்தைகள் பெற்றுக் கொள்ள வேண்டும் என ரஷிய அதிபர் புதின் தெரிவித்துள்ளார்.
ரஷியாவில் பிறப்பு விகிதம் கடந்த 1990யில் இருந்து குறைந்து வருகிறது. உக்ரைனுக்கு எதிராக சுமார் இரண்டு வருட போரில் 3 லட்சத்திற்கும் மேற்பட்ட ரஷியர்கள உயிரிழந்ததாக கூறப்படுகிறது. இதனால் ரஷியாவில் மக்கள் தொகையை அதிகரிக்க அந்நாட்டு அதிபர் புதின் ஒரு புதிய வழிமுறையை கூறியுள்ளார்.
இதுகுறித்து பேசிய அவர், “ரஷிய பெண்கள் 8 அல்லது அதற்கு மேற்பட்ட குழந்தைகள் பெற்றுக் கொள்ள வேண்டும். இதை நடைமுறையாக்க வேண்டும். அடுத்த 10 முதல் 20 வருடங்களில் ரஷியாவின் மக்கள் தொகையை உயர்த்துவதுதான் நமது முக்கிய இலக்கு” என்று தெரிவித்துள்ளார்.
மேலும் , ” நம்முடைய முன்னோர்கள் நான்கு, ஐந்து அல்லது அதற்கு மேற்பட்ட குழந்தைகளுடன் வலுவான பல தலைமுறை குடும்பங்களைக் கொண்ட பாரம்பரியத்தை பாதுகாத்து வருகின்றன. நம்முடைய பாட்டிகள், ஏழு, எட்டு மற்றும் அதற்கும் மேற்பட்ட குழந்தைகளை கொண்டிருந்தனர் என்பதை நினைவில் கொள்வோம்.
இந்த சிறந்த பாரம்பரியத்தை பாதுகாத்து புத்துயிர் பெறுவோம். குடும்பம் என்பது அரசு மற்றும் சமூகத்தின் அடித்தளம் மட்டுமல்ல, அது ஒரு ஆன்மீக நிகழ்வு, ஒழுக்கத்தின் ஆதாரம்.ரஷியாவின் மக்கள் தொகையைப் பாதுகாத்தல் மற்றும் அதிகரிப்பது என்பதே நமது இலக்கு” என்றும் தெரிவித்துள்ளார்.
ரஷியாவின் மக்கள் தொகை 2023 ஜனவரி 1 ஆம் தேதி கணக்கின்படி 14 கோடியே 64 லட்சத்து 47 ஆயிரத்து 424 என்பது குறிப்பிடத்தக்கது.
