கடந்த நவம்பர் மாதம் திருப்பதி ஏழுமலையான் கோவிலில் 108 கோடியே 46 இலட்சம் ரூபாய் உண்டியல் காணிக்கை வசூலாகி உள்ளதாக கோவில் தேவஸ்தானம் கூறியுள்ளது.
திருப்பதி சென்று வந்தால் வாழ்வில் திருப்பம் ஏற்படும் என்பதால், தினமும் திருப்பதி ஏழுமலையான் கோவிலுக்கு ஆயிரக்கணக்கான பக்தர்கள் சென்று சாமி தரிசனம் செய்து வருகின்றனர். இந்தியா மட்டுமின்றி அமெரிக்கா, சிங்கப்பூர், மலேசியா, இங்கிலாந்து உள்ளிட்ட வெளிநாடுகளில் இருந்தும் ஏராளமான பக்தர்கள் வந்து தரிசனம் செய்கின்றனர்.
திருப்பதி ஏழுமலையானைத் தரிசிக்கும் பக்தர்கள், தங்களின் வேண்டுதலை நிறைவேற்றி, உண்டியலில் காணிக்கை செலுத்துகிறார்கள். பக்தர்கள் தங்கம், வைர நகைகள், வெள்ளிப் பொருட்கள், பணத்தைக் காணிக்கையாக செலுத்துகின்றனர்.
உண்டியல் காணிக்கை செலுத்துவதற்காக, சுமார் 7 அடி உயரத்தில் துணியால் ஆன பிரமாண்டமான உண்டியல் உள்ளது. இந்த பிரமாண்ட உண்டியல்கள் நிரம்பியதும், திருப்பதி தேவஸ்தான ஊழியர்கள், உடனடியாக அதனை அங்கிருந்து அப்புறப்படுத்தி, வேறு உண்டியலைக் கொண்டு வந்து வைத்து விடுவார்கள்.
இந்த நிலையில், கடந்த நவம்பர் மாதம் திருப்பதி ஏழுமலையான் கோவிலில் 108 கோடியே 46 இலட்சம் ரூபாய் உண்டியல் காணிக்கை வசூலாகி உள்ளதாக கோவில் தேவஸ்தானம் கூறியுள்ளது.
கடந்த மாதம் திருப்பதி ஏழுமலையான் கோவிலுக்கு 19 இலட்சத்து 73 ஆயிரம் பக்தர்கள் வருகை தந்து சாமி தரிசனம் செய்துள்ளனர். மேலும், நவம்பர் மாதம் பக்தர்கள் வாங்கிச் சென்ற லட்டுக்களின் எண்ணிக்கை 97 இலட்சத்து 47 ஆயிரம் ஆகும். மேலும், 7 இலட்சத்து 6 ஆயிரம் பக்தர்கள் முடி காணிக்கை செலுத்தி உள்ளதாகவும் தேவஸ்தான நிர்வாகம் தெரிவித்துள்ளது.
