முல்லைப் பெரியாறு அணைக்கு வரும் நீரின் அளவு கிடுகிடுவென உயர்ந்துள்ள நிலையில், அனையின் நீர்மட்டம் 136 அடி ஆக உயர்ந்துள்ளது.
கேரளாவில் பாய்ந்து ஓடும் பெரியாறு நதியின் நீரை கிழக்கே திருப்பி தேனி, மதுரை மாவட்ட தேவைகளை பூர்த்தி செய்யும் வகையில் அதன் குறுக்கே ஆங்கிலேயர் ஆட்சி காலத்தில் அணை கட்டப்பட்டது.
முல்லையாறும், பெரியாறும் சேரும் இடத்தில் அணை கட்டப்பட்டுள்ளதால் இதற்கு முல்லை பெரியாறு என்று பெயர் வந்தது. மதுரை, தேனி உள்பட 5 மாவட்டங்களின் நீர் ஆதாரத்தை முல்லை பெரியாறு அணை பூர்த்தி செய்து வருகிறது.
இந்த அணையை தமிழக பொதுப் பணித் துறையே பராமரித்து வருகிறது. கேரளா மற்றும் தமிழகம் இடையே முல்லை பெரியாறு அணை தொடர்பான வழக்கு உச்ச நீதிமன்றத்தில் நிலுவையில் இருந்து வருகிறது.
தற்போது தமிழகத்தில் வடகிழக்கு பருவமழை தீவிரமடைந்து வருகிறது. முல்லை பெரியாறு அணையின் நீர் பிடிப்பு பகுதியான மேற்கு தொடர்ச்சி மலைப் பகுதியில் தற்போது கனமழை பெய்து வருகிறது. இதனால் அணைக்கு வரும் நீரின் அளவு தொடர்ந்து உயர்ந்துகொண்டே உள்ளது.
தற்போது முல்லை பெரியாறு அணைக்கு வினாடிக்கு 2,000 கன அடி வரை தண்ணீர் வருகிறது. அணையின் நீர்மட்டமும் 136 அடியாக உயர்ந்தது. முல்லை பெரியாறு அணையின் நீர்மட்டம் 132 அடியாக உயர்ந்தால் கேரள பகுதிகளுக்கு முதல் எச்சரிக்கை விட வேண்டும் என்பது உச்ச நீதிமன்றத்தின் உத்தரவு.
அதன்படி, கேரள பகுதிகளுக்கு முதல் கட்ட எச்சரிக்கை விடுக்கப்பட்டுள்ளது. எனினும் இது சாதாரண எச்சரிக்கை தானே தவிர வெள்ள எச்சரிக்கை கிடையாது. அணையின் நீர்மட்டம் 140 அடிக்கு மேல் சென்றால் மட்டுமே கேரள பகுதிகளுக்கு வெள்ள அபாய எச்சரிக்கை விடுக்கப்படும். தற்போது அணையின் நீர் மட்டம் உயர்வதை பொதுப்பணித் துறை அதிகாரிகள் உன்னிப்பாக கவனித்து வருகின்றனர்.
