குடியரசுத் தலைவர் திரௌபதி முர்மு மேற்கு வங்கம், தெலங்கானா மற்றும் ராஜஸ்தான் ஆகிய 3 மாநிலங்களுக்கு இன்று முதல் 6 நாட்கள் சுற்றுப்பயணம் மேற்கொள்கிறார்.
மேற்குவங்க மாநிலம் காரக்பூர் ஐ.ஐ.டி.யில் 69-வது பட்டமளிப்பு விழா இன்று நடைபெறுகிறது. இந்நிழக்ச்சியில் கலந்துகொள்ளும் குடியரசுத் தலைவர், மாணவர்களுக்கு பட்டங்களை வழங்குகிறார். தொடர்ந்து, தெலங்கானா மாநிலம் வரும் குடியரசுத் தலைவர் முர்மு, செகந்திராபாத்தில் உள்ள ராஷ்டிரபதி பவனில் ஓய்வெடுக்கிறார்.
பின்னர், நாளை நடைபெறும் ஐதராபாத் பப்ளிக் ஸ்கூல் சொசைட்டியின் நூற்றாண்டு விழாவில் கலந்து கொள்ளும் குடியரசுத் தலைவர் முர்மு, தனது வருடாந்திர தெற்குப் பயணத்தின் ஒரு பகுதியாக ஐதராபாத் செல்கிறார். 20-ம் தேதி, தெலங்கானாவின் யாதாத்ரி புவனகிரி மாவட்டத்தில் உள்ள போச்சம்பள்ளியில், ஜவுளி அமைச்சகத்தால் ஏற்பாடு செய்யப்பட்டுள்ள கைத்தறி மற்றும் நூற்பு பிரிவு மற்றும் தீம் பெவிலியனை பார்வையிடுகிறார்.
இந்நிகழ்ச்சியில், நெசவாளர்களுடன் உரையாடும் குடியரசுத் தலைவர் முர்மு, மாலை செகந்திராபாத்தில் எம்.என்.ஆர். கல்வி அறக்கட்டளையின் பொன்விழா கொண்டாட்டங்களில் கலந்து கொள்கிறார். பின்னர், 21-ம் தேதி ராஷ்டிரபதி நிலையத்தில் பல்வேறு திட்டங்களைத் தொடங்கி வைக்கிறார்.
22-ம் தேதி ராஷ்டிரபதி பவனில் மாநிலத்தின் முக்கியஸ்தர்கள், முன்னணி குடிமக்கள், கல்வியாளர்கள் மற்றும் பலருக்கும் குடியரசுத் தலைவர் மாளிகையில் வரவேற்பு அளிக்கிறார். 23-ம் தேதி ராஜஸ்தானின் பொக்ரானில் நடைபெறும் துப்பாக்கிச் சூடு பயிற்சியை நேரில் பார்வையிடுகிறார்.
