கடந்த 24 மணி நேரத்தில் தங்கள் நாட்டின் எல்லைக் கோட்டுக்குள் எட்டு சீனப் போர் விமானங்கள் அத்துமீறி நுழைந்ததாக தைவான் பாதுகாப்பு அமைச்சகம் குற்றம் சாட்டியுள்ளது.
கடந்த 1949-ஆம் ஆண்டு சீனாவில் உள்நாட்டு போர் தீவிரமடைந்த போது, பல தீவு கூட்டங்களை உள்ளடக்கிய தைவான் தங்களை தனிநாடாக அறிவித்துக் கொண்டது. ஆனால் அதை ஏற்க மறுக்கும் சீனா, தைவான் இப்போதும் தங்கள் நாட்டின் ஒரு பகுதியே என கூறி, சொந்தம் கொண்டாடி வருகிறது.
எனவே, தைவானை தன் கட்டுப்பாட்டின் கீழ் கொண்டு வர, சீனா பல்வேறு முயற்சிகளை செய்து வருகிறது. இதற்காக படைபலத்தைப் பயன்படுத்தவும், தயங்க மாட்டோம் என்று தைவானை மிரட்டி வருகிறது. இப்படிப்பட்ட சூழ்நிலையில் எதிரிக்கு எதிரி நண்பன் என்ற ரீதியில், தைவானுடன் அமெரிக்கா நெருக்கம் காட்டி வருகிறது. இது சீனாவை ஆத்திரமடைய செய்துள்ளது.
இந்நிலையில், கடந்த 24 மணி நேரத்தில் தங்கள் எல்லைக்குள் எட்டு சீனப் போர் விமானங்களும், ஒரு சீனப் பலூனும் பறந்ததாக தைவான் பாதுகாப்பு அமைச்சகம் குற்றம் சாட்டியுள்ளது.
சீனாவின் ஜே-10, ஜே-11 மற்றும் ஜே-16 போர் விமானங்கள் தங்கள் எல்லைக் கோட்டைக் கடந்ததாக தைவான் கூறியுள்ளது. மேலும், சீன பலூன் வடக்கு தைவான் துறைமுக நகரமான கீலுங்கின் வடமேற்கே 180 கிமீ தொலைவில், சுமார் 20 ஆயிரம் அடி உயரத்தில் காணப்பட்டது. கிழக்கு நோக்கிச் சென்ற அந்த பலூன், சுமார் ஒரு மணி நேரத்திற்குப் பிறகு காணாமல் போனதாக தைவான் பாதுகாப்பு அமைச்சகம் தெரிவித்துள்ளது. இந்த பலூன் சீனாவின் உளவு பார்க்கும் பலூனாக இருக்கலாம் என்று கூறப்படுகிறது.
சீனாவின் இந்த நடவடிக்கைக்கு தைவான் கடும் கண்டனம் தெரிவித்துள்ளது. மேலும், தைவான் இராணுவமும் உஷார்படுத்தப்பட்டுள்ளது.
