தமிழகத்தில் வடகிழக்கு பருவமழை இயல்பை விட 4 சதவீதம் அதிகரித்துள்ளதாக சென்னை வானிலை ஆய்வு மையம் தெரிவித்துள்ளது.
தமிழகத்திற்கு ஆண்டுதோறும் அக்டோபர் மாதம் தொடங்கி டிசம்பர் மாதம் வரை வடகிழக்கு பருவமழை காலம் ஆகும். வடகிழக்கு பருவமழையின் மூலமே தமிழகம் அதிக அளவில் மழையைப் பெறும்.
இந்த ஆண்டு வடகிழக்கு பருவமழை தமிழகம் முழுவதும் பரவலாக பெய்தது. மிக்ஜாம் புயல் காரணமாக, கடந்த 4 மற்றும் 5-ஆம் தேதிகளில் சென்னை, காஞ்சிபுரம், செங்கல்பட்டு, திருவள்ளூர் ஆகிய மாவட்டங்களில் கனமழை வெளுத்து வாங்கியது.
இதேபோல், தென் மாவட்டங்களில் கனமழை பெய்தது. குறிப்பாக, கடந்த 17 மற்றும் 18-ஆம் தேதிகளில், திருநெல்வேலி, தூத்துக்குடி, கன்னியாகுமரி, தென்காசி மாவட்டங்களில் வரலாறு காணாத வகையில் அதி கனமழை வெளுத்து வாங்கியது.
இந்த நிலையில், தமிழகத்தில் கடந்த அக்டோபர் 1-ஆம் தேதி தொடங்கி இன்று வரை 458.9 மில்லிமீட்டர் அளவு மழை பதிவாகியுள்ளது. ஆனால், இயல்பாக 442.8 மில்லிமீட்டர் அளவிலான மழை மட்டுமே பெய்திருக்க வேண்டும். எனவே, இது இயல்பை விட 4 சதவீதம் அதிகம் என சென்னை வானிலை மையம் தெரிவித்துள்ளது.
17 மாவட்டங்களில் இயல்பை விட அதிகளவில் மழை பெய்துள்ளது.
