கடந்த 10 ஆண்டு காலத்தில் இந்தியா எட்டியுள்ள சாதனைகள் குறித்து நமோ செயலி மூலம் கருத்துத் தெரிவிக்கலாம் என்று நாட்டு மக்களுக்கு பாரதப் பிரதமர் மோடி அழைப்பு விடுத்திருக்கிறார்.
மக்களவைத் தேர்தலுக்கு இன்னும் 4 மாதங்களே உள்ளன. இந்த நிலையில், மத்திய அரசின் செயல்பாடு, உள்ளூர் எம்.பி.யின் செயல்பாடு உள்ளிட்ட பல்வேறு விஷயங்களில் மக்களின் மனநிலையை அறிய மத்திய அரசு திட்டமிட்டிருக்கிறது.
இது தொடர்பாக, பிரதமர் நரேந்திர மோடி, ‘நமோ’ செயலி மூலம் கடந்த மாதம் ஆய்வு ஒன்றை நடத்தினார். இந்த ஆய்வில், மக்கள் தெரிவித்த கருத்துகளின் அடிப்படையில், சரியாக செயல்படாத எம்.பி.க்களுக்கு தேர்தலில் சீட் மறுக்கப்படும் என்று தகவல்கள் தெரிவிக்கின்றன.
இந்த நிலையில், இந்தியாவின் சாதனைகள் குறித்து நமோ செயலி மூலம் கருத்துத் தெரிவிக்கலாம் என்று பிரதமர் மோடி அழைப்பு விடுத்திருக்கிறார். இதுகுறித்து பாரதப் பிரதமர் நரேந்திர மோடி, தனது எக்ஸ் பக்கத்தில் பதிவு ஒன்றை வெளியிட்டிருக்கிறார்.
அப்பதவில், “கடந்த 10 ஆண்டுகளில் பல்வேறு துறைகளில் இந்தியா அடைந்துள்ள முன்னேற்றத்தைப் பற்றி நீங்கள் என்ன நினைக்கிறீர்கள்? நமோ ஆப்பில் உள்ள ‘ஜன் மேன் சர்வே’ மூலம் உங்கள் கருத்தை நேரடியாக என்னுடன் பகிர்ந்து கொள்ளுங்கள்” என்று கூறியிருப்பதோடு, சர்வேயில் பங்கேற்பதற்கான இணைப்பையும் பகிர்ந்திருக்கிறார்.
இந்த ஆய்வின் மூலம் மத்திய அரசு நிர்வாகம், தலைமை, மத்திய அரசு நிலையிலான வளர்ச்சி, நமோ செயலியைப் பயன்படுத்துவோரின் தொகுதி நிலவரம் உள்ளிட்டவை தொடர்பாக மக்களிடம் பல்வேறு கேள்விகள் எழுப்பப்படுகின்றன. மேலும், அரசுத் திட்டங்களின் தாக்கம் உள்ளிட்ட விவகாரங்கள் தொடர்பாகவும் கேள்விகள் உள்ளதாகத் தெரிகிறது.
