இந்திய வீரர்கள் கையொப்பமிட்ட ஜெர்சியை தென் ஆப்பிரிக்கா வீரர் டீன் எல்கருக்கு அன்பு பரிசாக இந்திய அணியின் கேப்டன் ரோகித் சர்மா வழங்கினார்.
இந்தியா-தென் ஆப்பிரிக்கா அணிகளுக்கு இடையேயான டெஸ்ட் போட்டி நேற்று முடிவடைந்தது. இந்தப் போட்டியில் இரு அணிகளும் தலா 1 வெற்றியைப் பதிவு செய்ததால் கோப்பை இரு அணிகளுக்கும் சமமாக கொடுக்கப்பட்டது.
தென் ஆப்பிரிக்கா வீரர் டீன் எல்கர் வீரர் இந்தியாவுக்கு எதிரான டெஸ்ட் தொடருடன் சர்வதேச கிரிக்கெட்டில் இருந்து ஓய்வு பெறுவதாக அறிவித்திருந்தார். அவர் முதல் டெஸ்ட் போட்டியில் 185 ரன்கள் விளாசி இந்தியாவைத் தோற்கடித்து ஆட்டநாயகன் விருது வென்று அசத்தினார்.
மேலும் 2வது போட்டியில் பவுமா காயமடைந்து வெளியேறியதால் தம்முடைய கடைசி போட்டியில் அணியை கேப்டனாக வழி நடத்தும் பொன்னான வாய்ப்பை பெற்ற அவர் முடிந்தளவுக்குப் போராடியும் வெற்றி காண முடியவில்லை.
டெஸ்ட் கிரிக்கெட்டுக்காக தம்முடைய கிரிக்கெட் வாழ்க்கையை அர்ப்பணித்த அவர் 5000-க்கும் மேற்பட்ட ரன்கள் குவித்துள்ளார். அத்துடன் கேப்டனாக விராட் கோலி தலைமையிலான இந்தியாவை 2 – 1 என்ற கணக்கில் தோற்கடித்த அவர் தென் ஆப்பிரிக்காவின் நிறைய வெற்றிகளில் பங்காற்றியுள்ளார்.
இந்நிலையில் சிறந்த டெஸ்ட் வீரர்களில் ஒருவராக அசத்தி விடை பெற்ற அவருக்குப் போட்டியின் முடிவில் இந்தியாவின் விராட் கோலி தம்முடைய கையொப்பமிட்ட ஜெர்சியை நேராக சென்று கட்டியணைத்து பரிசாக வழங்கினார்.
முன்னதாக 2வது இன்னிங்சில் எல்கர் அவுட்டாகி செல்லும்போது ரசிகர்களை எழுந்து நின்று கைதட்டி அவருக்குத் தலைவணங்குமாறு கேட்டுக்கொண்ட விராட் கோலி தற்போது ஜெர்சியை பரிசளித்து தன்னை மனதளவிலும் சிறந்தவர் என்பதை நிரூபித்துள்ளார்.
அதேபோல ஒட்டுமொத்த இந்திய வீரர்கள் கையொப்பமிட்ட ஜெர்சியை அன்புப் பரிசாக கேப்டன் ரோகித் சர்மா டீன் எல்கருக்கு பரிசளித்தார். அந்த வகையில் 2 சிறந்த இந்திய வீரர்கள் டீன் எல்கருக்கு நெஞ்சைத் தொடும் பரிசை கொடுத்து வழி அனுப்பியது ரசிகர்களை நெகிழ்ச்சியடைய வைத்துள்ளது.
இதுமட்டுமில்லாமல் நேற்றையப் போட்டியில் மற்றொரு பரிசும் வழங்கப்பட்டுள்ளது. ஆம் நேற்றையப் போட்டி முடிந்த உடன் விராட் கோலி தனது கையெழுத்திட்ட ஜெர்சியை தென் ஆப்பிரிக்க அணியின் சுழற்பந்துவீச்சாளர் கேசவ் மகாராஜுக்கு பரிசளித்தார்.
