பிரேசிலில் சுற்றுலா சென்ற மினி பஸ்ஸும், லாரியும் மோதிக் கொண்ட விபத்தில் 25 பேர் உயிரிழந்தனர்.
பிரேசில் நாட்டின் வடகிழக்கு மாநிலம் பாஹியா. இந்த மாநிலத்தின் வடக்கு கடற்கரை நகரான குவாராஜூபாவில் உள்ள கடற்கரைக்கு ஒரு மினி பேருந்தில் சுமார் 31 பேர் சுற்றுலா சென்றனர். இவர்கள் சுற்றுலாவை முடித்துக் கொண்டு ஜாக்கோபினா நகருக்கு திரும்பிக் கொண்டிருந்தனர்.
பிரேசிலின் பஹியாவில் உள்ள நோவா பாத்திமா – கவியாவோ நகரங்களுக்கு இடையிலான ஃபெடரல் சாலையில் சயோ ஜோஸ் டோ ஜேக்குயூப் நகர் அருகே மினி பேருந்து வந்து கொண்டிருந்தபோது, திடீரென லாரி ஒன்று பயங்கரமாக மோதியது. இதில் 25 பேர் சம்பவ இடத்திலேயே உயிரிழந்தனர். 6 பேர் படுகாயமடைந்தனர்.
காயமடைந்தவர்கள் அருகிலுள்ள மருத்துவமனையில் சேர்க்கப்பட்டிருக்கிறார்கள். விபத்தில் சிக்கிய 2 வாகனங்களும் அடையாளம் தெரியாத அளவுக்கு உருக்குலைந்து போயிருக்கின்றன. இந்த விபத்து காரணமாக அப்பகுதியில் போக்குவரத்து பாதிக்கப்பட்டது.
தகவலறிந்த பாஹியா போலீஸார், சம்பவ இடத்திற்கு விரைந்து சென்று மீட்பு பணி மற்றும் போக்குவரத்தை சீர் செய்யும் பணியில் ஈடுபட்டனர். உயிரிழந்தவர்கள் மற்றும் காயமடைந்தவர்கள் பெரும்பாலானோர் மினி பஸ்சில் வந்தவர்கள் என்று பாஹியா போலீஸார் தெரிவித்திருக்கின்றனர்.
இந்த விபத்து எவ்வாறு நேரிட்டது என்பது உடனடியாகத் தெரியவரவில்லை. இதுகுறித்து போலீஸார் விசாரித்து வருகின்றனர். இந்த சூழலில், விபத்தில் 25 பேர் வரை உயிரிழந்ததைத் தொடர்ந்து, ஜாகோபினா நகராட்சி 3 நாள் துக்கம் அனுசரிக்கப்படும் என்று அறிவித்திருக்கிறது.
