பக்தர்கள் சிரமத்திற்கு ஆளாகாமல் இருப்பதற்காக கடுமையாக உழைக்கிறோம் என்று இராமர் கோவில் அறக்கட்டளைத் தலைவர் நிருபேந்திர மிஸ்ரா கூறியிருக்கிறார்.
உத்தரப் பிரதேச மாநிலம் அயோத்தி இராமஜென்ம பூமியில் 1,800 கோடி ரூபாய் செலவில், மிகவும் பிரம்மாண்டமாக ஸ்ரீராமர் கோவில் கட்டப்பட்டு வருகிறது. இக்கோவில் கும்பாபிஷேகம் வரும் 22-ம் தேதி நடைபெறவிருக்கிறது.
இந்த சூழலில், அயோத்தி இராமர் கோவில் அறக்கட்டளையின் தலைவர் நிருபேந்திர மிஸ்ரா செய்தியாளர்களிடம் கூறுகையில், “ஜனவரி 22-ம் தேதி பிரம்மாண்ட கோவிலின் கும்பாபிஷேகத்திற்காக பரபரப்பான ஏற்பாடுகள் செய்து வருகிறோம்.
கோவிலில் ஸ்ரீராமரின் பழைய மற்றும் புதிய சிலைகள் வைக்கப்படும். தேவையான அனைத்து சடங்குகளையும் பின்பற்றி, கோவிலில் பழைய மற்றும் புதிய 2 சிலைகளையும் வைத்திருக்கிறோம்.
மற்ற அனைத்து சிலைகளும் ஜனவரி 21-ம் தேதிக்குள் இங்கு கொண்டு வரப்படும். ஜனவரி 23-ம் தேதி முதல் கோவிலுக்கு மக்கள் வரலாம். எந்த இடையூறும் இருக்காது. இங்கு நீங்கள் காணும் அனைத்து கட்டுப்பாடுகளும் அகற்றப்படும்.
அனைத்து பக்தர்களும் சிறந்த அனுபவத்தைப் பெற விரும்புகிறோம். எந்த சிரமத்தையும் எதிர்கொள்ளக் கூடாது. இதற்காக, நாங்கள் பல மணிநேரம் ஆலோசித்து பணியாற்றுகிறோம். மகா கும்பாபிஷேக விழாவை நாடு முழுவதும் நேரடியாக ஒளிபரப்ப பா.ஜ.க. திட்டமிட்டிருக்கிறது” என்றார்.
