அயோத்தி ராமர் கோவில் கும்பாபிஷேக விழா தொடர்பான தவறான கருத்துக்களை மறுத்துள்ள துவாரகா மற்றும் சிருங்கேரி சாரதா பீடங்கள், பக்தர்கள் தாராளமாக விழாவில் கலந்துகொள்ளலாம் என அறிவித்துள்னள.
கடந்த சில நாட்களுக்கு முன் ராமர் கோவில் கும்பாபிஷேகம் தொடர்பாக சிருங்கேரி சாரதா பீடத்தின் மடாதிபதி கூறியதாக வீடியோ ஒன்று சமூக வலைதளங்களில் வலம் வந்தது. இது பலத்த சர்ச்சையை ஏற்படுத்தியது.
இதனை மறுத்துள்ள சிருங்கேரி சாரதா பீடம் அறிக்கை ஒன்றை வெளியிட்டது. அதில், இராமர் கோவில் கும்பாபிஷேகம் நடைபெறுவது அனைத்து ஆஸ்திகர்களுக்கும் மகிழ்ச்சியளிக்கும் நிகழ்வு. இந்த நேரத்தில், நம் தர்மத்தை விரும்பாத சிலர், சமூக வலைதளம் மூலம் தக்சின்மன்யா சிருங்கேரி சாரதா மடத்தின் பீடாதிபதி, ஜகத்குரு சங்கராச்சார்யா ஸ்ரீ பாரதி தீர்த்த மகா சுவாமிஜி புகைப்படத்துடன், சிருங்கேரி சங்கராச்சாரியார் சுவாமிகள், ஸ்ரீராமர் கோவில் கும்பாபிஷேகத்துக்கு எதிரான கருத்துக்களை கூறியதாக தகவல் பரப்பி உள்ளனர்.
அவர் இது போன்ற தகவல் எதையும் வெளியிடவில்லை. இது, முற்றிலும் தவறான பிரசாரம். எனவே, ஆஸ்திகர்கள் இதனை நம்ப வேண்டாம் என தெரிவிக்கப்பட்டுள்ளது.
இதேபோல் துவாரகா சாரதா பீடமும் மறுப்பு தெரிவித்துள்ளது. ஜகத்குரு சங்கராச்சாரியார் துவாரகா சாரதாபீடம் சமூக ஊடகங்களில் ஒரு அறிக்கை ஒன்றை வெளியிட்டுள்ளது.
ராமாலயா அறக்கட்டளை மூலம் ராமஜென்மபூமியைப் பெற குருதேவ் பகவான் கடுமையாக உழைத்தார். இது சனாதன தர்மத்தைப் பின்பற்றுபவர்களுக்கு மகிழ்ச்சியைத் தருகிறது. இராமர் கோவில் கும்பாபிஷேகத்தின் அனைத்து நிகழ்வுகளும் வேதங்களின்படி மற்றும் மத நூல்களின் வரம்புகளுக்கு உட்பட்டு சரியாக செயல்படுத்தப்பட வேண்டும் என்று விரும்புகிறோம். இதில் பக்தர்கள் பங்கேற்று ராமரை தரிசனம் செய்யலாம் என கூறப்பட்டுள்ளது.
