சர்வதேச டி20 கிரிக்கெட் வரலாற்றில் 150 விக்கெட்டுகளை பதிவுசெய்த முதல் வீரர் என்ற சாதனையை நியூசிலாந்து வீரர் டிம் சவுதி படைத்துள்ளார்.
பாகிஸ்தான் கிரிக்கெட் அணி நியூசிலாந்துக்கு சுற்றுப்பயணம் மேற்கொண்டு 5 போட்டிகள் கொண்ட டி20 தொடரில் விளையாடிவருகிறது.
அதன்படி நியூசிலாந்து – பாகிஸ்தான் இடையேயான முதல் டி20 போட்டி நேற்று ஆக்லாந்தில் நடைபெற்றது. இப்போட்டியில் முதலில் பேட்டிங் செய்த நியூசிலாந்து அணி ஆரம்பம் முதலே தனது அதிரடியான ஆட்டத்தை வெளிப்படுத்தி வந்தது.
20 ஓவர்கள் முடிவில் நியூசிலாந்து அணி 8 விக்கெட்டுகளை இழந்து 226 ரன்கள் குவித்தது. இதனையடுத்து 227 ரன் என்ற இமாலய இலக்கை நோக்கி பாகிஸ்தான் களமிறங்கியது.
நியூசிலாந்தின் அபார பந்துவீச்சை தாக்குப்பிடிக்க முடியாத பாகிஸ்தான் அணி 18 ஓவர்களில் அனைத்து விக்கெட்டுகளையும் இழந்து 180 ரன்னுக்கு ஆல் அவுட் ஆனது. இதன் மூலம் 46 ரன் வித்தியாசத்தில் நியூசிலாந்து அபார வெற்றி பெற்றது.
நியூசிலாந்து அணி சார்பில் டிம் சவுதி 4 விக்கெட்டுகள் வீழ்த்தினார். இந்த ஆட்டத்தில் பாகிஸ்தான் வீரர் அப்பாஸ் அப்ரிடியை அவுட்டாக்கியபோது டி20 கிரிக்கெட்டில் தனது 150-வது விக்கெட்டை வீழ்த்தினார் சவுதி.
இதன்மூலம் சர்வதேச டி20 கிரிக்கெட் வரலாற்றில் 150 விக்கெட்டுகளை பதிவுசெய்த முதல் வீரர் என்ற சாதனையை படைத்தார்.
இதன் முதல் இடத்தில் டிம் சவுதி 151 விக்கெட்டுகளை எடுத்துள்ளார். இவருக்கு அடுத்தபடியாக ஷகிப் அல் ஹசன் 140 விக்கெட்டுகளை எடுத்து இரண்டாம் இடத்திலும், ரஷித் கான் 130 விக்கெட்டுகளை எடுத்து மூன்றாம் இடத்திலும், இஷ் சோதி 127 விக்கெட்டுகளை எடுத்து 4-வது இடத்திலும் உள்ளார்.
