75-வது குடியரசு தின விழாவை முன்னிட்டு, தலைநகர் டெல்லியில் கடும் குளிரையும் பொருட்படுத்தாமல் இராணுவ வீரர்கள் அணிவகுப்பு ஒத்திகை நடத்தினர்.
வருகிற ஜனவரி 26-ஆம் தேதி நாடு முழுவதும் குடியரசு தின விழா கொண்டாடப்பட உள்ளது. குடியரசு தின விழாவையொட்டி, தலைநகர் டெல்லியில் கண்கவர் அணிவகுப்பு நிகழ்ச்சி நடைபெறும். இதில், பல்வேறு மாநிலங்களின் அலங்கார ஊர்திகள் இடம் பெறும்.
தற்போது, 75-வது குடியரசு தின விழாவை முன்னிட்டு, நாடு முழுவதும் அரசு சார்பில் குடியரசு தின அணிவகுப்பு நிகழ்ச்சிக்கான ஏற்பாடுகள் நடைபெற்று வருகின்றன.
பாரத பிரதமர் நரேந்திர மோடியின் அழைப்பின் பேரில், 75-வது குடியரசு தின விழாவில் சிறப்பு விருந்தினராக, பிரான்ஸ் அதிபர் இமானுவேல் மேக்ரான் கலந்து கொள்கிறார். தேசிய முக்கியத்துவம் வாய்ந்த நிகழ்வு நெருங்கி வருவதால், பாதுகாப்பு அமைப்புகள் அதற்கான ஏற்பாடுகளைத் தொடங்கியுள்ளன.
டெல்லியில் நடைபெறும் குடியரசு தின விழாவின்போது, இந்தியா கேட் பகுதியில் உள்ள ராஜபாதையில் முப்படைகளின் அணிவகுப்பு நிகழ்ச்சி நடைபெறும். இதற்கான அணிவகுப்பு ஒத்திகை கர்தவ்யா பாதையில் இன்று காலை நடைபெற்றது. இதில், முப்படை வீரர்கள், துணை இராணுவப் படையினர் கலந்து கொண்டு அணிவகுப்பு ஒத்திகை நடத்தினர். கடும் குளிரிலும் உற்சாகத்துடன் இராணுவ வீரர்கள் தங்கள் கனத்த காலணிகளுடன் வீறுநடை போடுவதைக் காண முடிந்தது.
