இராமரின் ஆசீர்வாதத்தால் ஹாங்காங் பங்குச்சந்தையை முந்திய இந்தியா: அமைச்சர் பெருமிதம்!

பகவான் இராமர் நம்மை ஆசீர்வதிக்கிறார். இந்திய பங்குச் சந்தை ஹாங்காங்கை முந்தி உலக அளவில் 4-வது இடத்திற்கு முன்னேறி இருக்கிறது என்று மத்திய பெட்ரோலியத் துறை அமைச்சர் ஹர்தீப் சிங் பூரி தெரிவித்திருக்கிறார்.

இந்திய பங்குச்சந்தை மதிப்பு 4.33 டிரில்லியன் டாலராக அதிகரித்திருக்கிறது. இதன் மூலம், உலக பங்குச்சந்தை தரவரிசையில் ஹாங்காங்கை பின்னுக்குத் தள்ளி 4-வது இடத்திற்கு இந்தியா முன்னேறி இருக்கிறது.

இந்த சூழலில், இது குறித்து மத்திய பெட்ரோலியத் துறை அமைச்சர் ஹர்தீப் சிங் பூரி கூறுகையில், “இராமர் நம்மை ஆசீர்வதிக்கிறார். இந்திய பங்குச் சந்தை ஹாங்காங்கை முந்தி உலக அளவில் 4-வது இடத்திற்கு முன்னேறி இருக்கிறது. அடுத்த 1 அல்லது 2 ஆண்டுகளில் மேலும் முன்னேறுவோம்.

இந்தியா 5-வது பெரிய பொருளாதார நாடாகத் திகழ்கிறது. 2028-ம் ஆண்டுக்குள் இந்தியா 5 டிரில்லியன் டாலர் பொருளாதாரமாக இருக்கும் என்று எங்கோ சொல்லியிருந்தேன். ஆனால், 2028 வரை காத்திருக்க வேண்டிய அவசியமில்லை. 2024 – 25-க்குள் அது நடக்கும். 2030-ம் ஆண்டுக்குள் 10 டிரில்லியன் டாலர் பொருளாதாரமாக மாறுவோம்.

டிஜிட்டல் உள்கட்டமைப்பு, ஆட்டோமொபைல் சந்தை, எரிசக்தி அல்லது உயிரி எரிபொருள் போன்றவற்றில் இந்தியா மீதான உலகளாவிய ஆர்வம் ஒவ்வொரு நாளும் அதிகரித்து வருகிறது. எனவே, இந்தியப் பொருளாதாரம் மிகவும் நன்றாக இருக்கிறது” என்று கூறினார்.

மேலும், அஸ்ஸாம் மாநிலத்தில் நியாய யாத்திரையின்போது விதியை மீறியதாகக் கூறி, ராகுல் மீது வழக்குப் பதிவு செய்யுமாறு காவல்துறை டி.ஜி.பி. மற்றும் போலீஸாருக்கு அம்மாநில முதல்வர் ஹிமந்தா பிஸ்வா ஷர்மா உத்தரவிட்டிருப்பது குறித்து ஹர்தீப் சிங் பூரியிடம் கேட்டதற்கு, “அது பற்றி எனக்குத் தெரியாது. ஆனால், பொதுமக்கள் மிகவும் தெளிவானவர்கள். அவர்கள் விஷயங்களை நன்றாகப் புரிந்து கொள்வார்கள் என்று நான் நம்புகிறேன்” என்று தெரிவித்தார்.

நடப்பு 2023 – 24 நிதியாண்டில் இந்தியப் பொருளாதாரம் 7.3 சதவீதம் வளர்ச்சியடையும் என்று எதிர்பார்க்கப்படுகிறது. மேலும், வேகமாக வளரும் பெரிய பொருளாதாரமாக எஞ்சியிருக்கும் என்று தேசிய புள்ளியியல் அலுவலகம் ஜனவரி 5-ம் தேதி கூறியிருக்கிறது.

இந்தியாவின் பொருளாதாரம் 2022-23ல் 7.2 சதவீதமும், 2021 – 22-ல் 8.7 சதவீதமும் வளர்ச்சியடைந்துள்ளது. மேலும், ஹாங்காங்கை பின்னுக்குத் தள்ளி இந்தியா உலகளவில் 4-வது பங்குச் சந்தையாக மாறியது என்று ப்ளூம்பெர்க் சமீபத்தில் தெரிவித்திருந்தது குறிப்பிடத்தக்கது.

ப்ளூம்பெர்க் தொகுத்த தரவுகளின்படி, இந்தியப் பங்குச் சந்தைகளில் பட்டியலிடப்பட்ட பங்குகளின் ஒருங்கிணைந்த மதிப்பு, திங்கள்கிழமையின் முடிவில் 4.33 டிரில்லியன் அமெரிக்க டாலர்களை எட்டியது.

உறுதியான ஜிடிபி வளர்ச்சி கணிப்புகள், சமாளிக்கக்கூடிய அளவில் பணவீக்கம், மத்திய அரசு மட்டத்தில் அரசியல் ஸ்திரத்தன்மை மற்றும் மத்திய வங்கி தனது பணவியல் கொள்கையை இறுக்கியதற்கான அறிகுறிகள் அனைத்தும் இந்திய பங்குச் சந்தைக்கு ஒரு பிரகாசமான உயரத்தை அடைவதற்கு பங்களித்தன.

இந்தியாவின் பங்குச் சந்தை மூலதனம் 2023 டிசம்பர் 5-ல் முதல் முறையாக 4 டிரில்லியன் டாலர்களைத் தாண்டியது. இதில் பாதி கடந்த 4 ஆண்டுகளில் வந்ததாகக் கூறப்படுகிறது. முதல் 3 பங்குச் சந்தைகள் அமெரிக்கா, சீனா மற்றும் ஜப்பான் ஆகியவையாகும்.

ஒட்டுமொத்தமாக, கடந்த 12 மாதங்களாக இந்தியப் பங்குகளில் தங்களுடைய பணத்தை நிறுத்திய முதலீட்டாளர்களுக்கு சிறப்பானது. சில கொந்தளிப்புகள் இருந்தபோதிலும், காலண்டர் ஆண்டு 2023 பங்குச் சந்தை முதலீட்டாளர்களுக்கு அழகான பண ஈவுத்தொகையைக் கொடுத்தது.

2023-ம் ஆண்டிலேயே, ஒட்டுமொத்த அடிப்படையில் சென்செக்ஸ் மற்றும் நிஃப்டி 17-18 சதவீதம் அதிகரித்தது. இவை 2022-ல் தலா 3 முதல் 4 சதவீதம் மட்டுமே பெற்றன. குறிப்பிடத்தக்க வகையில், வெளிநாட்டு போர்ட்ஃபோலியோ முதலீட்டாளர்கள் மீண்டும் இந்தியாவை நோக்கி தங்கள் பார்வையை திருப்பி, நாட்டின் பங்குச் சந்தையில் நிகர வாங்குபவர்களாக மாறி இருக்கிறார்கள்.