பாரத பிரதமர் நரேந்திர மோடியின் வாழ்க்கை வரலாறு ‘விஸ்வநேதா’ என்ற பெயரில் திரைப்படமாக உருவாகி வருகிறது.
பாரத பிரதமர் மோடியின் அரசியல் வாழ்வினை சித்தரிக்கும் படமான ‘பி.எம்.நரேந்திர மோடி’ என்ற திரைப்படம் 2019 ஆம் ஆண்டு வெளியானது.
இந்த படத்தை ஓமங் குமார் இயக்கியிருந்தார். இத்திரைப்படத்தினை தயாரிப்பாளர் சுரேஷ் ஓபராய் மற்றும் சந்தீப் சிங் இணைந்து தயாரித்திருந்தார்.
இப்படத்தில் விவேக் ஓபராய் பிரதமர் நரேந்திர மோடியாக நடித்திருந்தார். இந்த நிலையில் தற்போது பாரத பிரதமர் நரேந்திர மோடியின் வாழ்க்கை, மற்றுமொரு படமாக தயாராகிவருகிறது.
முந்தைய படத்தில் அவரது பால்ய கால வாழ்க்கை முதல் அரசியலுக்கு வருவது வரையிலான வரலாற்றை கொண்டிருந்தது.
இந்நிலையில் இப்போது தயாராகி வரும் படம் அவர் பிரதமர் ஆன பிறகு செய்த சாதனைகளை மையமாக வைத்து வரவுள்ளது.
குறிப்பாக சட்டப்பிரிவு 370-ஐ ரத்து செய்தது, பண மதிப்பு இழப்பு, ஜி.எஸ்.டி அறிமுகம், அயோத்தி ராமர் கோவில் பிரதிஷ்டை போன்ற முக்கிய நிகழ்வுகள் படத்தில் இடம்பெற இருக்கின்றன.
சி.எச்.கிராந்தி குமார் இயக்கும் இந்த படத்துக்கு ‘விஸ்வநேதா’ என்று டைட்டில் வைத்துள்ளனர். தமிழ், தெலுங்கு, இந்தி, மலையாளம், கன்னடம் உள்ளிட்ட மொழிகளில் தயாராகிறது.
அபய் தியோல், நீனா குப்தா, அனுபம் கெர், பல்லவி ஜோஷி முக்கிய கதாபாத்திரங்களில் நடிக்கிறார்கள். எம்.எம்.கீரவாணியின் மகன் கால பைரவா இசையமைக்கிறார்.
இந்த படப்பிடிப்பு விரைவில் தொடங்க உள்ளது. நரேந்திர மோடியாக நடிக்க நடிகர் தேர்வு மும்முரமாக நடைபெற்று வருகிறது.
