ஐ.நா. பாதுகாப்பு கவுன்சிலில் அவசர சீர்திருத்தங்கள்: பிரதமர் மோடி, பிரான்ஸ் அதிபர் வலியுறுத்தல்!

ஐ.நா. பாதுகாப்புக் கவுன்சிலில் அவசர சீர்திருத்தங்களை மேற்கொள்ள வேண்டும் என்று பிரதமர் நரேந்திர மோடியும், பிரான்ஸ் அதிபர் இம்மானுவேல் மேக்ரானும் வலியுறுத்தி இருக்கின்றனர்.

பிரான்ஸ் அதிபர் இம்மானுவேல் மேக்ரான், இந்தியாவுக்கு வந்திருக்கிறார். ராஜஸ்தான் மாநிலம் ஜெய்ப்பூரில் மேக்ரானை வரவேற்ற பிரதமர் மோடி, நேற்று நடந்த நாட்டின் 75-வது குடியரசு தின விழாவிலும் சிறப்பு விருந்தினராக மேக்ரானை பங்கேற்கச் செய்தார்.

பின்னர், இரு தலைவர்களும் சந்தித்து உரையாடினர். இது தொடர்பாக, இந்தியா, பிரான்ஸ் வெளியிட்டிருக்கும் கூட்டறிக்கையில், “பிரதமர் நரேந்திர மோடியும், பிரான்ஸ் அதிபர் இம்மானுவேல் மேக்ரானும் தங்களது சந்திப்பின்போது, ஒரு சமமான மற்றும் அமைதியான சர்வதேச ஒழுங்கை நிலைநிறுத்த வலியுறுத்தினர்.

மேலும், உலகளாவிய சவால்களை எதிர்கொள்ளவும், வளர்ந்து வரும் முன்னேற்றங்களுக்கு உலகைத் தயார்படுத்தவும், சீர்திருத்த மற்றும் பயனுள்ள பலதரப்புக்கான அழைப்பை மீண்டும் வலியுறுத்தினர். அதேபோல, ஐக்கிய நாடுகள் பாதுகாப்பு கவுன்சிலில் அவசர அவசியம் கருதி சீர்திருத்தங்களை மேற்கொள்ள வேண்டும்.

அதோடு, ஐ.நா.வில் உள்ள அரசுகளுக்கு இடையேயான பேச்சுவார்த்தையில், உரை அடிப்படையிலான பேச்சுவார்த்தைகளை முன்கூட்டியே தொடங்க வேண்டும் என்றும் அழைப்பு விடுத்தனர். ஐ.நா. சபையில் இந்தியா நிரந்தர உறுப்பினராவதற்கு பிரான்ஸ் தனது உறுதியான ஆதரவை மீண்டும் வலியுறுத்தியது.

பாரிய அட்டூழியங்கள் ஏற்பட்டால் வீட்டோவைப் பயன்படுத்துவதைக் கட்டுப்படுத்துவது குறித்த உரையாடல்களை வலுப்படுத்த இரு தலைவர்களும் ஒப்புக்கொண்டனர். தவிர, கடந்த ஆண்டு அக்டோபர் 7-ம் தேதி இஸ்ரேல் மீது நடத்தப்பட்ட தீவிரவாதத் தாக்குதலை இரு தலைவர்களும் வன்மையாகக் கண்டித்தனர்.

அதேசமயம், சர்வதேச மனிதாபிமான சட்டங்களுக்கு மதிப்பளித்து, காஸா பகுதியில் பாதிக்கப்பட்ட மக்களுக்கு உதவிகள் செல்வதற்கான சூழ்நிலையை உருவாக்க வேண்டியதன் அவசியத்தையும் வலியுறுத்தினர். இரு தலைவர்களும் அனைத்து பிணைக் கைதிகளையும் உடனடியாக மற்றும் நிபந்தனையின்றி விடுவிக்க வேண்டும் என்று அழைப்பு விடுத்தனர்.

ஏற்கெனவே உலகில் கணிசமான பொருளாதார தாக்கத்தை ஏற்படுத்தியுள்ள செங்கடல் பிராந்தியத்தில் மோதல் மேலும் விரிவடைவதற்கான சாத்தியக் கூறுகள் குறித்தும் அவர்கள் மிகுந்த கவலையை வெளிப்படுத்தினர். செங்கடலில் கடற்பயண சுதந்திரத்தை நிலைநிறுத்துவது மற்றும் கடல்சார் சர்வதேச சட்டத்தை மதிப்பது ஆகியவற்றின் மிக முக்கியத்துவத்தை நினைவு கூர்ந்தனர்” என்று தெரிவிக்கப்பட்டிருக்கிறது.