இந்திய கிரிக்கெட் வீரரான மயங்க் அகர்வால் விமானத்தில் சென்று கொண்டிருந்த போது திடீர் உடல்நிலை பாதிப்பு ஏற்பட்டதால் மருத்துவமனையில் அனுமதிக்கப்பட்டுள்ளார்.
இந்தியாவில் ரஞ்சி கோப்பை கிரிக்கெட் தொடர் நடைபெற்று வருகிறது. இதில் கர்நாடக அணியின் கேப்டனாக விளையாடி வருகிறார் மயங்க் அகர்வால்.
ரஞ்சி கோப்பையில் திரிபுரா அணிக்கு எதிரான போட்டியில் வெற்றி பெற்ற பின் சக வீரர்களுடன் அகர்தலாவில் இருந்து குஜராத் மாநிலம் சூரத் செல்ல விமானத்தில் எறியுள்ளார்.
விமான பயணத்தின் போது அவரின் இருக்கையில் வைத்திருந்த குடிநீரை எடுத்து சிறிதளவு அருந்தியதும் கடும் எரிச்சல் ஏற்பட்டு அதை கீழே துப்பி இருக்கிறார்.
எனினும், எரிச்சல் அதிகமாக இருந்ததால் உடனடியாக விமானத்தில் இருந்து மயங்க் அகர்வால் இறக்கபட்டார். அவருடன் கர்நாடகா மாநில அணியின் மேலாளரும் மருத்துவமனைக்கு விரைந்தனர்.
அகர்தலாவில் உள்ள ஐஎல்எஸ் மருத்துவமனையில் தீவிர சிகிச்சை அளிக்கப்பட்டு வருகிறது. தற்போது அவர் அபாய கட்டத்தை தாண்டி விட்டதாக தெரிய வந்துள்ளது. இந்த சம்பவம் குறித்து விசாரணை நடைபெற்று வருகிறது.
மயங்க் அகர்வால் உடல்நிலை குறித்து கர்நாடகா மாநில அணியின் மேலாளர் ரகுராம் பட், ” மயங்க் அகர்வாலுக்கு ஆபத்தில்லை. நாளை மருத்துவமனையில் இருந்து டிஸ்சார்ஜ் செய்யப்படுவார். அவர் மீண்டும் களத்திற்கு திரும்ப முடிவு செய்வதற்கு முன், பெங்களூருவுக்குத் திரும்பிச் சென்று உள்ளூர் மருத்துவர்களை கலந்தாலோசிப்பார் என்று எதிர்பார்க்கப்படுகிறது. அவர் விரைவில் களத்தில் இறங்குவார் ” எனக் கூறியுள்ளார்.
