பா.ஜ.க. தலைவர் ரஞ்சித் சீனிவாஸ் கொலை வழக்கில் 15 பேருக்கு தூக்கு தண்டனை விதித்து கேரள மாநிலம் மாவேலிக்கரை நீதிமன்றம் பரபரப்பு தீர்ப்பு அளித்திருக்கிறது. குற்றம் சாட்டப்பட்டவர்கள் கருணைக்கு தகுதியற்றவர்கள் என்றும் நீதிமன்றம் தெரிவித்திருக்கிறது.
கேரள மாநிலம் ஆலப்புழா வெள்ளக்கிணறு பகுதியைச் சேர்ந்தவர் ரஞ்சித் சீனிவாஸ். வழக்கறிஞரான இவர், பா.ஜ.க. பிற்படுத்தப்பட்டோர் பிரிவின் மாநிலச் செயலாளராக இருந்து வந்தார். இந்த சூழலில், கடந்த 2021-ம் ஆண்டு டிசம்பர் 19-ம் தேதி வீட்டில் இருந்த ரஞ்சித் சீனிவாஸை, அவரது மனைவி, மகள் மற்றும் தாய் முன்னிலையில் ஒரு கும்பல் வீடு புகுந்து கொடூரமாக வெட்டிக் கொலை செய்தது.
இக்கொலை சம்பவம் கேரள மாநிலம் மட்டுமல்லாது, நாடு முழுவதும் பெரும் பரபரப்பை ஏற்படுத்தியது. இக்கொலை தொடர்பாக போலீஸார் வழக்குப் பதிந்து விசாரணை நடத்தினர். இதில், தற்போது தடை செய்யப்பட்டிருக்கும் பாப்புலர் ஃப்ரன்ட் ஆஃப் இந்தியா (பி.எஃப்.ஐ.) மற்றும் சோசியல் டெமாக்ரெடிக் பார்ட்டி ஆஃப் இந்தியா (எஸ்.டி.பி.ஐ.) ஆகிய அமைப்புகளைச் சேர்ந்தவர்களுக்கு தொடர்பு இருப்பது தெரியவந்தது.
இதையடுத்து, மேற்கண்ட அமைப்புகளைச் சேர்ந்த நிஜாம், அஜ்மல், அனூப், முகமது அஸ்லாம், அப்துல்கலாம் என்ற சலாம், அப்துல் கலாம், சபரூதின், மன்சாத், ஜசீப் ராஜா, நவாஸ், சமீர், நஸீர், ஜாஹீர் உசேன், ஷாஜி, ஷெர்னாஸ் அஷரப் ஆகிய 15 பேரை போலீஸார் கைது செய்தனர். இவர்கள் மீது கொலை, கூட்டுச் சதி உள்ளிட்ட பல்வேறு பிரிவுகளின் கீழ் வழக்குப் பதிவு செய்யப்பட்டது.
இந்த வழக்கு விசாரணை கேரள மாநிலம் மாவேலிக்கரை கூடுதல் மாவட்ட அமர்வு நீதிமன்றத்தில் நடந்து வந்தது. கடந்த 3 ஆண்டுகளாக வழக்கு விசாரணை நடந்து வந்த நிலையில், குற்றம் சாட்டப்பட்ட 15 பேரும் குற்றவாளிகள் என்று நீதிமன்றம் தீர்ப்பளித்தது. இதையடுத்து, குற்றவாளிகளுக்கு அதிகபட்ச தண்டனை வழங்க வேண்டும் என்று அரசுத் தரப்பில் வாதிடப்பட்டது.
அதன்படி, குற்றவாளிகள் 15 பேருக்கும் தூக்கு தண்டனை விதித்து நீதிபதி ஸ்ரீதேவி தீர்ப்பளித்தார். மேலும், இந்த வழக்கு அரிதிலும் அரிதான வழக்கு என்றும், குற்றம் சாட்டப்பட்டவர்கள் கருணைக்கு தகுதியற்றவர்கள் எனவும் நீதிமன்றம் தெரிவித்தது. 15 பேருக்கு தூக்கு தண்டனை விதிக்கப்பட்டிருக்கும் சம்பவம் கேரளாவில் பெரும் பரபரப்பை ஏற்படுத்தி இருக்கிறது.
