அரசு ரகசியங்களை கசியவிட்டதாக தொடரப்பட்ட சைபர் வழக்கில் இம்ரான் கான் மற்றும் அவரது உதவியாளருக்கு தலா 10 ஆண்டுகள் சிறைத் தண்டனை விதிக்கப்பட்ட நிலையில், தற்போது ஊழல் வழக்கில் இம்ரான் கானுக்கும், அவரது மனைவி புஷ்ரா பீவிக்கும் 14 ஆண்டுகள் சிறைத் தண்டனை விதிக்கப்பட்டிருக்கிறது.
பாகிஸ்தான் முன்னாள் பிரதமர் இம்ரான் கான் மீது 100-க்கும் மேற்பட்ட வழக்குகள் தொடரப்பட்டிருக்கின்றன. இதில், தோஷகானா எனப்படும் அரசு கருவூல ஊழல் வழக்கில் இம்ரான் கானுக்கு கடந்த ஆண்டு 3 ஆண்டு சிறைத் தண்டனை விதிக்கப்பட்டது. இதையடுத்து, அவர் சிறையில் அடைக்கப்பட்டிருக்கிறார்.
இந்த தண்டனையை எதிர்த்து இம்ரான் கான் மேல்முறையீடு செய்திருக்கும் நிலையில், அரசு ரகசியங்களை கசியவிட்டதாக தொடரப்பட்ட சைபர் வழக்கில் இம்ரான் கான் மற்றும் அவரது நெருங்கிய உதவியாளரும், முன்னாள் அமைச்சருமான ஷா முகமது குரேஷி ஆகியோருக்கு தலா 10 ஆண்டுகள் சிறைத் தண்டனை விதிக்கப்பட்டது.
இந்த நிலையில், தற்போது மேலும் ஒரு ஊழல் வழக்கில் இம்ரான் கான், அவரது மனைவிக்கு தலா 14 ஆண்டுகள் சிறைத் தண்டனை விதிக்கப்பட்டிருக்கிறது. இம்ரான் கான் பிரதமராக பதவி வகித்தபோது, அவருக்கும், அவரது மனைவி புஷ்ரா பீவிக்கும் நிறைய பரிசுப் பொருட்கள் கிடைத்தன.
இந்த பரிசுப் பொருட்களை அரசிடம் ஒப்படைக்காமல் ஊழல் செய்ததாக தொடரப்பட்ட வழக்கில் இன்று தீர்ப்பு அளிக்கப்பட்டிருக்கிறது. இதில், இருவருக்கும் தலா 14 ஆண்டுகள் சிறைத் தண்டனை விதித்து நீதிமன்றம் உத்தரவிட்டிருக்கிறது. மேலும், இருவருக்கும் 787 மில்லியன் அமெரிக்க டாலர் அபராதம் விதிக்கப்பட்டிருப்பதோடு, இருவரும் 10 ஆண்டுகள் அரசுப் பதவிகளை வகிக்கவும் தடை விதிக்கப்பட்டிருக்கிறது.
