இந்தியாவில் முதல் முறையாக தயாராகும் சாம்சங் நிறுவனத்தின் மடிக்கணினி!

இந்தியாவில் முதல் முறையாக சாம்சங் நிறுவனம் நொய்டா தொழிற்சாலையில் தங்களின் மடிக்கணினி தயாரிப்பை தொடங்கவுள்ளது.

கொரிய எலக்ட்ரானிக்ஸ் நிறுவனமான சாம்சங் 2024 ஆம் ஆண்டு இந்தியாவில் உள்ள நொய்டா தொழிற்சாலையில் லேப்டாப்களை உற்பத்தி செய்யத் திட்டமிட்டுள்ளது.

ஸ்மார்ட் போனில் ஆப்பிள் கம்பெனிக்கு நிகராக இருப்பது சாம்சங். தொலைக்காட்சி, தொலைபேசி, மடிக்கணினி என அனைத்து சாதனங்களையும் சாம்சங் நிறுவனம் தயாரித்து வருகிறது.

அந்த வகையில் தற்போது சாம்சங் நிறுவனம் தன்னுடைய மடிக்கணினியை முதல் முறையாக இந்தியாவில் தயாரிக்கவுள்ளது.

சாம்சங் நிறுவனத்தின் தலைவர் டி.எம். ரோஹ், உற்பத்தி அடிப்படையில் இந்தியா தங்களுக்கு ஒரு முக்கியமான நாடு என்று கூறியிருக்கிறார். இந்தியாவில் லேப்டாப் தயாரிப்பிற்கான தயாரிப்பு நடந்து வருவதாகவும் ரோஹ் உறுதிப்படுத்தியுள்ளார்.

இதுகுறித்து பேசிய அவர், “நாங்கள் இந்த ஆண்டு நொய்டா தொழிற்சாலையில் லேப்டாப் தயாரிப்பைத் தொடங்குவோம். அதற்கான ஏற்பாடுகள் ஏற்கனவே நடந்து வருகின்றன.

நொய்டா சாம்சங்கின் மிக முக்கியமான உற்பத்தித் தளமாகும். இது சாம்சங்கின் இரண்டாவது பெரிய தொழிற்சாலை. உலகளாவிய தேவைக்கு ஏற்ப அதை மேம்படுத்த ஆலையில் சில மாற்றங்கள் செய்ய இருக்கிறோம்” என்றும் தெரிவித்துள்ளார்.

மேலும் அவர், “நாங்கள் இந்திய அரசாங்கம் மற்றும் இந்தியாவில் உள்ள சாம்சங் குழுவுடன் மிகவும் நெருக்கமாக ஒத்துழைக்கிறோம். வெளிப்படையான ஒத்துழைப்பு மிகவும் பயனுள்ளதாக இருக்கிறது. அத்தகைய நல்ல ஒத்துழைப்பைப் பேணுவதன் மூலம், ஒரு சிறந்த சூழ்நிலையை உருவாக்க முடியும்” எனவும் குறிப்பிட்டுள்ளார்.

உலகளாவிய ஸ்மார்ட்போன் சந்தையில் கடந்த ஆண்டு வளர்ச்சி குறைந்துள்ளது எனவும் இந்த ஆண்டு சராசரியைவிட மிக அதிகமான வளர்ச்சி இருக்கும் என்று நம்புவதாகவும் அவர் கூறினார்.