டேவிஸ் கோப்பை டென்னிஸ்: பாகிஸ்தானை வீழ்த்திய இந்தியா!

டேவிஸ் கோப்பை டென்னிஸ் தொடரில், 4-0 என்ற கணக்கில் பாகிஸ்தானை வீழ்த்தி இந்தியா சாம்பியன் பட்டம் வென்றது.

டேவிஸ் கோப்பை டென்னிஸ் தொடரின் உலக குரூப் 1 பிளே ஆப் சுற்றில் இந்திய அணி இடம்பெற்றுள்ளது. இந்த தொடரின் முதல் போட்டி கடந்த 3-ஆம் தேதி, பாகிஸ்தான் தலைநகர் இஸ்லாமாபாத்தில் இந்தியா – பாகிஸ்தான் அணிகளுக்கிடையே நடைபெற்றது. 60 ஆண்டுகளுக்குப் பிறகு இந்திய டென்னிஸ் அணி பாகிஸ்தானில் விளையாடியது.

முதல் நாளில், இரண்டு ஒற்றையர் பிரிவு போட்டிகள் நடைபெற்றன. இதன் முதல் போட்டியில் இந்திய வீரர் ராம்குமார், பாகிஸ்தான் வீரர் ஐசம் அல் ஹக் குரேஷியுடன் விளையாடினார். இதில் இந்திய வீரர் ராம்குமார் ராமநாதன் 6-7, 7-6, 6-0 என்ற செட் கணக்கில் பாகிஸ்தான் வீரர் ஐசம் அல் ஹக் குரேஷியை வீழ்த்தினார்.

அதேபோல், நேற்று நடைபெற்ற மற்றொரு ஒற்றையர் போட்டியில், இந்திய வீரர் ஸ்ரீராம் பாலாஜி பாகிஸ்தான் வீரர் அகீல் கானுடன் விளையாடினார். இந்தப் போட்டியில் ஸ்ரீராம் பாலாஜி 7-5, 6-3 என்ற செட் கணக்கில் பாகிஸ்தானின் அகீல் கானைத் தோற்கடித்தார். இதனால், குரூப் சுற்றில் இந்தியா 2-0 என்ற கணக்கில் முன்னிலை பெற்றுள்ளது.

இரண்டாவது நாளான நேற்று நடந்த இரட்டையர் பிரிவு ஆட்டத்தில் இந்தியாவின் யுகி பாம்ப்ரி – சகெத் மைனெனி ஜோடி, பாகிஸ்தானின் முஜாமில் முர்தசா – அகீல் கான் ஜோடியை எதிர்கொண்டது. இந்த போட்டியில் இந்தியா 6-2, 7-6 என்ற நேர் செட்டில் பாகிஸ்தானைத் தோற்கடித்து தொடரை கைப்பற்றியது.

இதை அடுத்து ஒற்றையர் பிரிவு போட்டி நடைபெற்றது. இந்த போட்டியில், இந்தியாவின் நிக்கி பூனச்சா 6-3, 6-4 என்ற நேர் செட்டில் பாகிஸ்தானின் முகமது சோயிப்பை வீழ்த்தினார். ஐந்தாவது போட்டி நடத்தப்படவில்லை. இதனால், 4-0 என்ற கணக்கில் பாகிஸ்தான் அணியை வீழ்த்தி இந்தியா சம்பியன் பட்டம் வென்றது.

டேவிஸ் கோப்பை டென்னிஸ் வரலாற்றில் இதுவரை நடைபெற்ற அனைத்து போட்டிகளிலும், தொடர்ந்து பாகிஸ்தானை வீழ்த்தி இந்தியா வென்று வருவது குறிப்பிடத்தக்கது.