BIMSTEC நாடுகளுக்கு இடையேயான நீர் விளையாட்டு போட்டி : இன்று தொடக்கம்!

மத்திய விளையாட்டுத் துறை அமைச்சர் அனுராக் சிங் தாக்கூர், முதலாவது BIMSTEC நீர் விளையாட்டு சாம்பியன்ஷிப் போட்டிகளை தொடங்கி வைத்தார்.

டெல்லியில் முதல் முறையாக BIMSTEC நீர் விளையாட்டுகள் சாம்பியன்ஷிப் போட்டிகள் இந்த ஆண்டு தொடங்குகிறது.

இந்த BIMSTEC நாடுகளில் பங்களாதேஷ், பூட்டான், இந்தியா, நேபாளம், இலங்கை உட்பட தெற்காசியாவிலிருந்து ஐந்து மற்றும் மியான்மர் மற்றும் தாய்லாந்து உட்பட தென்கிழக்கு ஆசியாவிலிருந்து இரண்டு நாடுகள் உள்ளன.

இதில் மூன்று விளையாட்டுப் போட்டிகளில் 39 பதக்கங்களும், மொத்தம் 9 கோப்பைகளும் வழங்கப்பட உள்ளன. மேலும் இதில் பல்வேறு BIMSTEC உறுப்பு நாடுகளைச் சேர்ந்த 268 விளையாட்டு வீரர்கள் இந்தப் போட்டிகளில் பங்கேற்கின்றனர்.

இதை மத்திய விளையாட்டுத்துறை அமைச்சர் அனுராக் சிங் தாக்கூர் இன்று தொடங்கி வைத்தார். பின்னர் இந்த நிகழ்ச்சியில் பேசிய இவர், ” உலகின் 25 சதவீத மக்கள் தெற்காசியா மற்றும் தென்கிழக்கு ஆசிய பிராந்தியத்தில் வாழ்கின்றனர்.

7 BIMSTEC நாடுகள் ஒருங்கிணைந்து செயல்படுவதன் மூலம், வங்காள விரிகுடா பகுதியில் பயணம் மற்றும் போக்குவரத்துக்கு மேம்படுவதோடு, வளர்ச்சி மற்றும் ஒத்துழைப்பு அதிகரித்துள்ளது.

இந்த நீர் விளையாட்டுப் போட்டி, விளையாட்டு வீரர்களுக்கு இடையிலான நட்பை ஆழப்படுத்த உதவுவதுடன், விளையாட்டு கலாச்சாரத்தை உருவாக்கவும் உதவும்.

இந்த நோக்கத்துடனேயே நேபாளத்தில் நடந்த உச்சிமாநாட்டின் போது, இந்த விளையாட்டுத் தொடர்பான அறிவிப்பை பாரத பிரதமர் நரேந்திர மோடி வெளியிட்டார் ” என்று கூறினார்.

மேலும் அவர், BIMSTEC நாடுகளின் கூட்டமைப்பு வரலாற்றில் முதன்முறையாக ஒரு விளையாட்டு போட்டி நடத்தப்படுவதாக குறிப்பிட்டார்.

இந்த தொடக்க விழாவில் நேபாளத்தின் விளையாட்டுத் துறை அமைச்சர் டிக் பகதூர் லிம்பு மற்றும் BIMSTEC நாடுகளின் தூதர்கள் உள்ளிட்டோர் கலந்து கொண்டனர்.

முதலாவது BIMSTEC நீர் விளையாட்டு (அக்வாடிக்ஸ்) சாம்பியன்ஷிப் போட்டி, டெல்லியில் டாக்டர் சியாமா பிரசாத் முகர்ஜி நீச்சல் குள வளாகத்தில் நடைபெறுகிறது.

இதில் நீச்சல், வாட்டர் போலோ மற்றும் டைவிங் பிரிவுகளில் 20 வயதுக்குட்பட்டவர்களுக்கான போட்டிகள் நடைபெறுகின்றன.