இந்தியாவில் நடைபெற்று வரும் புரோ கபடி தொடரில் நேற்றைய போட்டியில் குஜராத் ஜெயண்ட்ஸ் மற்றும் ஹரியானா ஸ்டீலர்ஸ் அணிகள் வெற்றி பெற்றது.
இந்தியாவில், மாநிலங்களுக்கிடையே நடைபெறும் கபடி லீக் தொடரில் மொத்தம் 12 அணிகள் பங்குபெற்று விளையாடி வருகின்றன. பெங்கால் வாரியர்ஸ், பெங்களூரு புல்ஸ், தபாங் டெல்லி கே.சி, குஜராத் ஜெயண்ட்ஸ், ஹரியானா ஸ்டீலர்ஸ், ஜெய்ப்பூர் பிங்க் பாந்தர்ஸ், பாட்னா பைரேட்ஸ், புனேரி பல்டன், தமிழ் தலைவாஸ், தெலுங்கு டைட்டன்ஸ், யு மும்பா மற்றும் உ.பி. யோதாஸ் ஆகிய அணிகள் பங்குபெற்றுள்ளன.
இந்நிலையில் நேற்று இரண்டு போட்டிகள் நடைபெற்றது. முதல் போட்டி கொல்கத்தாவில் இரவு 8 மணிக்கு நடைபெற்றது. இதில் பெங்கால் வாரியர்ஸ் – குஜராத் ஜெயண்ட்ஸ் அணிகள் விளையாடின.
விறுவிறுப்பாக நடைபெற்ற இந்த ஆட்டத்தில் குஜராத் ஜெயண்ட்ஸ் அணி 41-32 என்ற புள்ளி கணக்கில் அபார வெற்றி பெற்றது. இந்த வெற்றி மூலம் ஐந்தாவது இடத்தில் இருந்த குஜராத் ஜெயண்ட்ஸ் அணி நான்காவது இடத்திற்கு முன்னேறியுள்ளது.
இதைத் தொடர்ந்து மற்றொரு ஆட்டம் இரவு 9 மணிக்கு நடைபெற்றது. இதில் ஹரியானா ஸ்டீலர்ஸ் – உ.பி. யோதாஸ் அணிகள் விளையாடின. இந்தப் போட்டியின் தொடக்கத்தில் இருந்தே ஹரியானா ஸ்டீலர்ஸ் அணி புள்ளிகளை எடுக்க தொடங்கியது.
இதில் ஹரியானா ஸ்டீலர்ஸ் அணி 50-34 என்ற புள்ளி கணக்கில் உ.பி. யோதாஸ் அணியை வீழ்த்தியது. இந்த வெற்றி மூலம் ஹரியானா ஸ்டீலர்ஸ் அணி புள்ளி பட்டியலில் 5வது இடத்திற்கு முன்னேறியுள்ளது.
