அபுதாபியில் பிப்ரவரி 13 ஆம் தேதி நடைபெறும் “அஹ்லான் மோடி” என்ற பிரமாண்ட நிகழ்வில் பிரதமர் நரேந்திர மோடி உரையாற்றுகிறார்.
அபுதாபியில் கட்டப்பட்டுள்ள பிரமாண்ட இந்து கோயிலை பிரதமர் மோடி வரும் 14ஆம் தேதி திறந்து வைக்க உள்ளார். அபுதாபியின் பட்டத்து இளவரசரும், ஐக்கிய அரபு அமீரக ஆயுதப் படைகளின் துணைத் தளபதியுமான ஷேக் முகமது பின் சயீத் அல் நஹ்யான், 2015 ஆம் ஆண்டு கோவில் நிர்மாணத்திற்காக 13.5 ஏக்கர் நிலத்தை நன்கொடையாக வழங்கினார்.
1,200க்கும் மேற்பட்ட இந்து கோயில்களை நிறுவி வரும் பாப்ஸ் (BAPS) அமைப்பு அபுதாபி கோயிலை கட்டியுள்ளது. இதை நல்லிணக்கத்தின் திருவிழா என அங்குள்ள மக்கள் கொண்டாடி வருகின்றனர். இந்த கோயில் திறப்பு விழாவில் பங்கேற்பதற்காக பிரதமர் மோடி அபுதாபி செல்கிறார்.
முன்னதாக அபுதாபியில் பிப்ரவரி 13 ஆம் தேதி நடைபெறும் அஹ்லான் மோடி என்ற இந்திய வம்சாவளியினர் பங்கேற்கும் கூட்டத்தில் பிரதமர் மோடி உரையாற்றுகிறார். அரேபிய மொழியில் “வரவேற்பு” என்று மொழிபெயர்க்கப்பட்ட இந்த நிகழ்வு, இந்திய புலம்பெயர்ந்தோரின் மிகப்பெரிய கூட்டங்களில் ஒன்றாக இருக்கும் என்று மதிப்பிடப்பட்டுள்ளது.
இதில் சுமார் 60,000 பேர் பங்கேற்பார்கள் என எதிர்பார்க்கப்படுகிறது. ஐக்கிய அரபு எமிரேட்ஸில் உலகிலேயே அதிக எண்ணிக்கையிலான இந்திய புலம்பெயர்ந்தோர் வசிக்கின்றனர்.
