இராமேஸ்வரம் பாம்பன் கடலின் நடுவே கட்டப்பட்டுள்ள புதிய ரயில்வே தூக்கு பாலத்தை வருகின்ற 28- ஆம் பிரதமர் மோடி நாட்டிற்கு அர்பணிக்கிறார்.
பிரதமர் நரேந்திர மோடி வரும் 27ஆம் தேதி கோவை மாவட்டம், பல்லடத்தில் நடைபெறும் பாஜக மாநில தலைவர் அண்ணாமலையின் ‘என் மண் என் மக்கள்’ பாதயாத்திரை நிறைவு விழாவில் பங்கேற்கிறார். தமிழகத்தில் பாஜக செல்வாக்கு பெற்ற மாவட்டம் என பெயர் பெற்ற கோவை மாவட்டத்தில் பிரதமரின் தேர்தல் பிரச்சாரக் கூட்டமாக இது அமையும் வகையில் ஏற்பாடு செய்யப்பட்டு வருகிறது.
இதனைத் தொடர்ந்து 28ஆம் தேதி பிரதமர் மோடி கோவையிலிருந்து ஹெலிகாப்டர் மூலம் தூத்துக்குடி துறைமுக பள்ளி வளாகத்தில் காலை 11 மணியளவில் பிரதமர் வந்து இறங்குகிறார். பின், அங்கிருந்து கார் மூலம் விழா நடக்கும் இடத்திற்கு செல்கிறார்.
பிரதமர் மோடி தூத்துக்குடி துறைமுகப் பகுதியில் நடக்கும் அரசு விழாவில் பங்கேற்கிறார். இதனைத்தொடர்ந்து தூத்துக்குடி வெளித் துறைமுக விரிவாக்கத்திற்கான திட்டத்திற்கும் பிரதமர் மோடி அடிக்கல் நாட்டுகிறார்.
அதன்பின், குலசேகரப்பட்டினம் ராக்கெட் ஏவு தளத்திற்கு அடிக்கல் நாட்டுகிறார். இதற்காக 2,233 ஏக்கர் நிலம் கையகப்படுத்தி தயார் நிலையில் உள்ளது. பின்னர், 580 கோடி ரூபாய் செலவில் ராமேஸ்வரம் பாம்பன் கடலின் நடுவே கட்டப்பட்டுள்ள புதிய ரயில்வே தூக்கு பாலத்தை பிரதமர் மோடி துவக்கி வைத்து நாட்டுக்காக அர்ப்பணிக்கிறார்.
