மகளிர் பிரீமியர் லீக் தொடக்க விழாவில் கலந்து கொள்ளவுள்ள பாலிவுட்டின் சினிமா நட்சத்திரங்கள் யார் என்ற அறிவிப்பு வெளியாகியுள்ளது.
ஐபிஎல் போன்று பெண்களுக்காக மகளிர் பிரீமியர் லீக் ( WPL ) கடந்த ஆண்டு தொடங்கப்பட்டது. இதில் 5 அணிகள் விளையாடின.
முதல் சீசனில் மும்பை அணி சாம்பியன் பட்டம் வென்றது. மார்ச் மாதம் நடைபெற்ற இதன் முதலாவது சீசன் போட்டிகள் அனைத்தும் மராட்டிய மாநிலம் மும்பையில் மட்டுமே நடத்தப்பட்டன.
இந்த தொடரில் மும்பை இந்தியன்ஸ், டெல்லி கேப்பிடல்ஸ், உ.பி. வாரியர்ஸ், குஜராத் ஜெயன்ட்ஸ், பெங்களூரு ராயல் சேலஞ்சர்ஸ் ஆகிய 5 அணிகள் பங்கேற்றன.
முதலாவது கிரிக்கெட் போட்டியில் ஹர்மன்பிரீத் கவுர் தலைமையிலான மும்பை இந்தியன்ஸ் அணி சாம்பியன் கோப்பையை வென்றது. இந்த ஆண்டுக்கான பெண்கள் பிரீமியர் லீக் தொடர் பிப்ரவரி 23ஆம் தேதி தொடங்குகிறது.
இந்த நிலையில் நாளை மறுநாள் மாலை 6.30 மணிக்கு பெங்களூரு மைதானத்தில் மகளிர் பிரீமியர் லீக் தொடருக்கான தொடக்க விழா பிரம்மாண்டமாக நடைபெறவுள்ளது.
கடந்த ஆண்டு நடைபெற்ற தொடக்க விழாவில் கீர்த்தி சனோன் மற்றும் கியாரா அத்வானி இருவரும் நடனமாடி ரசிகர்களை உற்சாகப்படுத்தினர். இம்முறை பாலிவுட்டின் உச்ச நாயகர்கள் தொடக்க விழாவில் நிகழ்ச்சி நடத்தவுள்ளதாக அறிவிப்பு வெளியாகியுள்ளது.
குறிப்பாக பாலிவுட் சூப்பர் ஸ்டார் ஷாரூக் கான், ஷாகித் கபூர், சித்தார்த் மல்ஹோத்ரா, வருண் தவான், கார்த்திக் ஆர்யன், டைகர் ஷெராஃப் உள்ளிட்ட 6 பேரும் பங்கேற்கவுள்ளனர்.
இது ரசிகர்களிடையே ஆச்சரியத்தை ஏற்படுத்தியுள்ளது. இதுமட்டுமல்லாமல் இசை நிகழ்ச்சிகள், நடனங்கள் உள்ளிட்டவற்றுக்கும் ஏற்பாடுகள் செய்யப்பட்டுள்ளன.
