சுற்றுலா பயணிகளின் வசதிக்காக, வரும் 29-ஆம் தேதி முதல் நீலகிரி மாவட்டத்தில் சிறப்பு மலை ரயில்களை இயக்க தெற்கு ரயில் முடிவு செய்துள்ளது.
மலைகளின் அரசி என்று அழைக்கப்படும் ஊட்டிக்கு, தமிழக மட்டுமின்றி வெளி மாநிலங்களிலிருந்தும், வெளி நாடுகளிலிருந்தும் ஏராளமான சுற்றுலாப் பயணிகள் தினந்தோறும் வருகின்றனர். பெரும்பாலான சுற்றுலா பயணிகள் ஊட்டி மலை ரயில் பயணம் செய்கின்றனர். இந்த மலை ரயிலில் பயணம் செய்வது தனிச்சிறப்பு வாய்ந்த அனுபவமாக உள்ளது.
ஏற்கனவே, இயக்கப்பட்டு வரும் மலை ரயில்களுடன் கூடுதலாக மலை இரயில்களை இயக்க தெற்கு ரயில்வே முடிவு செய்துள்ளது. அந்த வகையில், வருகிற 29-ஆம் தேதி முதல் ஜூலை 1-ஆம் தேதி வரை, வாரம்தோறும் வெள்ளி, சனி, ஞாயிறு, திங்கள் ஆகிய 4 நாட்களுக்கு சிறப்பு மலை ரயில்கள் இயக்க தெற்கு ரயில்வே முடிவு செய்துள்ளது.
அதன்படி குன்னூர் – ஊட்டி இடையே காலை 8:20 மணிக்கும், ஊட்டி – குன்னூர் இடையே மாலை 4:45 மணிக்கும் சிறப்பு மலை ரயில்கள் இயக்கப்பட உள்ளது. இது தவிர, மேட்டுப்பாளையத்தில் இருந்து ஊட்டிக்கு வெள்ளி மற்றும் சனிக்கிழமைகளில் காலை 9:10 மணிக்கு சிறப்பு மலை ரயில் இயக்கப்படும்.
மேலும், சனி, ஞாயிற்றுக்கிழமைகளில் காலை 11:25 மணிக்கு ஊட்டியிலிருந்து மேட்டுப்பாளையத்துக்கு சிறப்பு ரயில் இயக்கப்பட உள்ளது. இதேபோல், ஊட்டி – கேத்தி இடையே வெள்ளி முதல் திங்கள் வரை 4 நாட்களுக்கு காலை 9:45 மணி, காலை 11:30 மணி, மாலை 3:00 மணி என்ற இடைவெளிகளில் சிறப்பு மலை ரயில்கள் இயக்கப்படும்.
ஊட்டி – குன்னூர் இடையேயான மலை ரயிலில் உள்ள 5 பெட்டிகளில் 80 முதல் வகுப்பு, 130 இரண்டாம் வகுப்பு என மொத்தம் 210 இருக்கைகள் இருக்கும். மேட்டுப்பாளையம் முதல் குன்னூர் வரையிலான 4 ரயில் பெட்டிகளில், 40 முதல் வகுப்பு, 92 இரண்டாம் வகுப்பு என மொத்தம் 132 இருக்கைகள் இடம் பெற்றிருக்கும் என்று தென்னக ரயில்வே தெரிவித்துள்ளது.
