கோவை – ராஜஸ்தான் இடையே சிறப்பு ரயில் இயக்கம்!

கோவையில் இருந்து ராஜஸ்தான் மாநிலம் பஹத்ஹிகோதி ரயில் நிலையத்துக்கு சிறப்பு ரயில் இயக்கப்பட உள்ளதாக தெற்கு ரயில்வே தெரிவித்துள்ளது.

இதுகுறித்து சேலம் ரயில்வே கோட்ட நிர்வாகம் வெளியிட்டுள்ள செய்திக்குறிப்பில் கூறியிருப்பதாவது, கோவையில் இருந்து ராஜஸ்தான் மாநிலம் பஹத்ஹிகோதி ரயில் நிலையத்துக்கு சிறப்பு ரயில் இயக்கப்படுகிறது.

வரும் 14-ஆம் தேதி (வியாழக்கிழமை) முதல் ஏப்ரல் 4-ஆம் தேதி வரை வாரந்தோறும் வியாழக்கிழமைகளில் கோவையில் இருந்து, அதிகாலை 2.30 மணிக்கு புறப்படும் கோவை – பஹத்ஹிகோதி சிறப்பு ரயில் (வண்டி எண் – 06181) சனிக்கிழமைகளில் காலை 11.30 மணிக்கு பஹத்ஹிகோதி ரயில் நிலையத்தைச் சென்றடையும்.

மறுமார்க்கமாக வரும் 17-ஆம் தேதி முதல் ஏப்ரல் 7-ஆம் தேதி வரை, ஞாயிற்றுக்கிழமைகளில் பஹத்ஹிகோதி நிலையத்தில் இருந்து, இரவு 7.30 மணிக்கு புறப்படும். பஹத்ஹிகோதி- கோவை விரைவு ரயில் (வண்டி எண் – 06182) புதன்கிழமைகளில் காலை 9.30 மணிக்கு கோவை ரயில் நிலையத்தை வந்தடையும்.

இந்த சிறப்பு ரயில் திருப்பூர், ஈரோடு, சேலம், ஜோலார்பேட்டை, காட்பாடி, ரேணிகுண்டா, கடப்பா, கூட்டி, காச்சிகுடா, நிஜாமாபாத், பூர்னா, வாசிம், அகோலா, சூரத் உள்ளிட்ட ரயில் நிலையங்களில் நின்று செல்லும் என்று கூறப்பட்டுள்ளது.