அரசியல் அமைப்புக்கு மட்டுமே நீதிபதிகள், வழக்கறிஞர்கள் விசுவாசமாக இருக்க வேண்டும் என்று நீதிபதிகள், வழக்கறிஞர்களுக்கு உச்சநீதிமன்ற தலைமை நீதிபதி சந்திரசூட் தெரிவித்துள்ளார்.
நாக்பூர் உயர்நீதிமன்ற பார் அசோஷியேசன் சங்கத்தின் நூற்றாண்டு விழா வெகு சிறப்பாக கொண்டாடப்பட்டது. இந்த நிகழ்ச்சியில், தலைமை நீதிபதி சந்திரசூட் கலந்து கொண்டார்.
அப்போது அவர் பேசியதாவது: இந்தியா போன்ற ஜனநாயக நாட்டில், பெரும்பாலான தனி நபர்களுக்கு, அரசியல் கொள்கை அல்லது ஈர்ப்பு இருக்கும். மனிதர்கள், அரசியல் விலங்குகள் என்று அரிஸ்டாட்டில் கூறியுள்ளார். இதற்கு வழக்கறிஞர்கள் விதிவிலக்கு அல்ல. எப்படி இருப்பினும், பார் அசோஷியேசன் உறுப்பினர்கள் ஒவ்வொருவருக்கும், மிக உயர்ந்த விசுவாசம் என்பது பாகுபாடான நலன்களுக்காக இருக்கக்கூடாது. நீதிமன்றம் மற்றும் அரசியலமைப்பு மீது இருக்க வேண்டும்.
நீதித்துறையின் சுதந்திரத்திற்கும், பார் கவுன்சில் சுதந்திரத்திற்கும் நெருங்கிய உறவு இருப்பதை மறந்து விடக்கூடாது. சுதந்திரமான பார் கவுன்சில் என்பது சட்டத்தின் ஆட்சி மற்றும் அரசியலமைப்பு நிர்வாகத்தை பாதுகாப்பதற்கான தார்மீக அரணாக செயல்படுகிறது.
ஒரு வழக்கில் தீர்ப்பு வழங்கப்பட்டவுடன், அது பொதுமக்களின் சொத்தாகிறது. அதற்காக பாராட்டுகளையும், விமர்சனத்தையும் ஏற்றுக் கொள்வதற்கு தயாராக இருக்க வேண்டும் என்று கூறினார்.
