துணைவேந்தர்களை ராஜினாமா செய்யத் தூண்டும் அளவிற்கு பல்கலைக்கழகங்களில் நிலவும் நிதி நெருக்கடிகளுக்கு தமிழக அரசு தீர்வு காண வேண்டுமென அம்மா மக்கள் முன்னேற்றக்கழக பொதுச்செயலாளர் டிடிவி தினகரன் வலியுறுத்தியுள்ளார்.
இதுகுறித்து அவர் வெளியிட்டுள்ள ட்விட்டர் பதிவில்,
மதுரை காமராஜர் பல்கலைக்கழகம் பல ஆண்டுகளாக நிதி நெருக்கடியில் சிக்கித் தவித்துவரும் நிலையில்,
அப்பல்கலைக்கழகத்தின் துணைவேந்தர் குமார், அண்மையில் தமிழக ஆளுநரை சந்தித்து தனது ராஜினாமா கடிதத்தை வழங்கியிருப்பதாக வரும் செய்தி மிகுந்த அதிர்ச்சியளிப்பதாகக் கூறியுள்ளார்.
இதேபோல், தமிழகத்தில் இருக்கும் மாநிலப் பல்கலைக்கழகங்கள் அனைத்திலும், கடும் நிதி நெருக்கடி நிலவி வருவதாகத் தொடர் புகார்கள் எழுந்துள்ளதாகவும் அவர் சுட்டிக் காட்டியுள்ளார்.
மாநிலப் பல்கலைக்கழகங்களில் நிலவும் நிதி நெருக்கடிகளைக் களைய உயர்கல்வித்துறையால் அமைக்கப்பட்ட உயர்மட்டக்குழுவும் மாநில அரசைப் போலவே உறங்கிக் கொண்டிருப்பதாகக் குற்றம் சாட்டியுள்ள அவர்,
மாநில அரசின் பொதுநிதியின் மூலமாக அனைத்து பல்கலைக்கழகங்களும் இயங்குவதற்கு தேவையான நடவடிக்கைகளை மேற்கொள்ள வேண்டும் எனவும் வலியுறுத்தியுள்ளார்.
