ஆன்லைன் சூதாட்டத்தால் கடந்த 3 நாட்களில் இருவர் பலியான நிலையில், அப்பாவிகளின் உயிரிழப்பைத் தடுப்பதில் அரசுக்கு அக்கறை இல்லை என பாமக தலைவர் அன்புமணி ராமதாஸ் சாடியுள்ளார்.
இதுதொடர்பாக அவர் வெளியிட்டுள்ள அறிக்கையில்,
ஆன்லைன் சூதாட்டத்தில் பணத்தை இழந்ததால் தற்கொலை செய்து கொண்ட, தனியார் பொறியியல் கல்லூரி மாணவர் ராமையா புகலாவை இழந்து வாடுவோருக்கு இரங்கல் தெரிவித்துக் கொள்வதாக குறிப்பிட்டுள்ளார்.
மாங்காட்டைச் சேர்ந்த சீனிவாசன் கடந்த 14-ஆம் தேதி தற்கொலை செய்து கொண்ட நிலையில், அடுத்த மூன்றாவது நாளில் மற்றொர உயிர் ஆன்லைன் சூதாட்டத்திற்கு பலியாகியிருப்பதை தாங்கிக் கொள்ள முடியவில்லை என்றும் குறிப்பிட்டுள்ளார்.
உச்சநீதிமன்றத்தில் ஆன்லைன் சூதாட்டத்துக்கு தடை பெற தமிழக அரசு எந்த நடவடிக்கையையும் மேற்கொள்ளவில்லை என்றும் அவர் தெரிவித்துள்ளார்.
தமிழ்நாட்டு மக்களைக் காக்க வேண்டிய தமிழக அரசு, ஆன்லைன் சூதாட்ட நிறுவனங்களின் நலன்களை பாதுகாக்கத் துடிக்கிறதோ என்ற ஐயம் எழுவதாக அன்புமணி கூறியுள்ளார்.
