விடுமுறை தினத்தை ஒட்டி, உதகை அரசு தாவரவியல் பூங்காவில் நடைபெற்று வரும் மலர் கண்காட்சியைக் காண ஏராளமான சுற்றுலா பயணிகள் குவிந்தனர்.
நீலகிரி மாவட்டத்திற்கு ஆண்டுதோறும் ஏப்ரல் மற்றும் மே மாதத்தில் லட்சக்கணக்கான சுற்றுலா பயணிகள் வருகை தருவது வழக்கம்.
இவ்வாறு வரும் சுற்றுலா பயணிகளைக் கவரும் வகையில் ஆண்டுதோறும், கோடை விழாக்கள் நடத்தப்பட்டு வருகின்றன.
அந்த வகையில், உதகை அரசு தாவரவியல் பூங்காவில் 126-வது மலர் கண்காட்சி கடந்த 10-ம் தேதி தொடங்கியது.
இந்த கண்காட்சியில், குழந்தைகளைக் கவரும் வகையில், டிஸ்னி வேர்ல்ட், உதகை மலை ரயில் உள்ளிட்டவற்றின் வடிவங்கள் பல வண்ண ரோஜா மலர்களால் வடிவமைக்கப்பட்டுள்ளன.
கடந்த பத்தாம் தேதி தொடங்கிய மலர் கண்காட்சியை நேற்று வரை ஒரு லட்சத்து 46 ஆயிரத்து 788 பேர் கண்டு களித்துள்ளனர்.
