சர்வதேச யோகா தினத்தை முன்னிட்டு பாஜக தேசிய தலைவர் ஜே.பி.நட்டா, மத்திய அமைச்சர் அமித் ஷா உள்ளிட்டோர் யோகா பயிற்சியில் ஈடுபட்டனர்.
டெல்லியில் உள்ள யமுனா விளையாட்டு மைதானத்தில் பாஜக தேசிய தலைவரும், மத்திய அமைச்சருமான ஜே.பி.நட்டா யோகா பயிற்சியில் ஈடுபட்டார். அப்போது பேசிய அவர், பிரதமர் மோடியின் தலைமையில், யோகா உலகின் பல்வேறு பகுதிகளுக்கு சென்றுள்ளதாகவும், பொதுமக்கள் தங்கள் அன்றாட வாழ்க்கையில் யோகாவை பின்பற்றி பலன் பெற வேண்டும் என்றும் கேட்டுக்கொண்டார்.
மத்திய உள்துறை அமைச்சர் அமித்ஷா அகமதாபாத்தில் யோகா பயிற்சியில் ஈடுபட்டார். நிகழ்ச்சியில் பேசிய அவர், யோகா மனித குலத்திற்கும் உலகிற்கும் இந்தியா அளித்த பரிசு என்றும் உலகமே யோகாவை ஏற்றுக்கொண்டுள்ளதாக தெரிவித்தார். இன்று சுமார் ஒரு கோடிக்கும் அதிகமானோர் யோகா செய்வதாகவும், யோகாவை உலகிற்கு கொண்டு சென்றதில் பிரதமர் மோடி முக்கிய பங்கு வகித்ததாகவும் அவர் கூறினார்.
அசாம் மாநிலத்தில் நடைபெற்ற நிகழ்ச்சியில் யோகா பயிற்சியில் ஈடுபட்ட மத்திய அமைச்சர் சர்பானந்த் சோனோவால், பிரதமர் மோடியின் தலைமையில், உலக மக்கள் யோகாவை ஏற்றுக்கொண்டுள்ளதாகவும், இது இந்தியாவின் சாதனை என்றும் கூறினார்.
புவனேஸ்வர் கலிங்கா மைதானத்தில் நடைபெற்ற யோகா தின நிகழ்ச்சியில், ஒடிசா முதல்வர் மோகன் சரண் யோகா பயிற்சியில் ஈடுபட்டார். இதேபோல் அசாம் முதல்வர் ஹிமந்தா பிஸ்வா சர்மா தேஜ்பூரில் நடைபெற்ற விழாவில் யோகா பயிற்சியில் ஈடுபட்டார்.
