புதுச்சேரியில் வாரியத் தலைவர் பதவி வழங்கக்கோரி பாஜக சட்டமன்ற உறுப்பினர்கள் மற்றும் சுயேச்சை சட்டமன்ற உறுப்பினர்கள் துணைநிலை ஆளுநர் சி.பி.ராதாகிருஷ்ணனை சந்தித்து கோரிக்கை வைத்தனர்.
புதுச்சேரி ஆளுநர் மாளிகையில், பாஜக எம்எல்ஏ கல்யாணசுந்தரம் தலைமையில் பாஜக சட்டமன்ற உறுப்பினர்கள் ஜான்குமார், ரிச்சர்ட் ஜான்குமார் உள்ளிட்ட 7 சட்டமன்ற உறுப்பினர்கள், துணை நிலை ஆளுநர் சிபி ராதாகிருஷ்ணனை சந்தித்தனர்.
அப்போது தொகுதி எம்எல்ஏக்களுக்கு தெரியாமல் திறக்கப்படும் ரெஸ்டோ பார்களால் மக்களுக்கு இடையூறு ஏற்படுவதால், இதனை ஒழுங்குப்படுத்தவேண்டும் என அவர்கள் தெரிவித்தனர்.
மேலும், அரசுக்கு அவப்பெயர் ஏற்படுத்தும் ஊழல் அதிகாரிகளை பணி நீக்கம் செய்யவேண்டும், சட்டமன்ற உறுப்பினர்களுக்கு வாரிய தலைவர் பதவியை வழங்க வேண்டும் உள்ளிட்ட பல்வேறு கோரிக்கைகளை வலியுறுத்தி மனு அளித்தனர்.
அப்போது, சம்மந்தப்பட்ட துறை செயலர்களை அழைத்து, சட்டமன்ற உறுப்பினர்களின் கோரிக்கைகளை ஆராயுமாறு உத்தரவிட்ட சி.பி.ராதாகிருஷ்ணன், இதுதொடர்பாக முதல்வரிடம் பேசுவதாகவும் தெரிவித்தார்.
