விடுதலை சிறுத்தைகள் கட்சித் தலைவர் திருமாவளவனுக்கு மயிலாடுதுறை அமர்வு நீதிமன்றம் பிடிவாரண்ட் பிறப்பித்தது.
மயிலாடுதுறையில் கடந்த 2003ஆம் ஆண்டு, விடுதலை சிறுத்தைகள் கட்சித் தலைவர் திருமாவளவன் தலைமையில் மதமாற்ற தடைச் சட்டத்தை கண்டித்து பேரணி நடைபெற்றது.
இந்தப் பேரணியின்போது காவல்துறையினருக்கும் விடுதலை சிறுத்தைகள் கட்சியை சேர்ந்தவர்களுக்கும் இடையே கலவரம் ஏற்பட்டது. இதனையடுத்து அப்போதைய காவல் ஆய்வாளர் மோகன்வேல் அளித்த புகாரின்பேரில், திருமாவளவன் மீது பொதுச் சொத்துக்கு சேதம் விளைவித்தல் உள்ளிட்ட பல்வேறு பிரிவுகளின் கீழ் வழக்குப்பதிவு செய்யப்பட்டு, மயிலாடுதுறை அமர்வு நீதிமன்றத்தில் விசாரணை நடந்து வந்தது.
இந்நிலையில் வழக்கில் திருமாவளவன் ஆஜராகாததாலும், அவர் தரப்பு வழக்கறிஞர்கள் மனுதாக்கல் செய்யாததாலும், திருமாவளவனுக்கு மாவட்ட அமர்வு நீதிமன்ற நீதிபதி விஜயகுமாரி பிடிவாரன்ட் பிறப்பித்து உத்தரவிட்டார்.
