கரூர் மாவட்டத்தில் உள்ள மாயனுார் கதவணைக்கு நீர்வரத்து அதிகரித்ததால் முழு கொள்ளளவை எட்டியது.
கர்நாடகா நீர்ப்பிடிப்பு பகுதிகளில் பெய்த கனமழையால் மேட்டூர் அணை நிரம்பியது. இதனையடுத்து அணையிலிருந்து விநாடிக்கு ஒரு லட்சத்து 70 ஆயிரம் கனஅடி வரை தண்ணீர் திறக்கப்பட்டதால், காவிரி ஆற்றில் வெள்ளப்பெருக்கு ஏற்பட்டது.
இதனையடுத்து காவிரியில் வரும் நீர் மாயனூர் கதவணையில் தேக்கி வைக்கும் நடவடிக்கை மேற்கொள்ளப்பட்டது. இந்த நிலையில், 17 ஆயிரத்து 500 கனஅடியாக நீர்வரத்து அதிகரித்துள்ளதால் கதவணையிலிருந்து 15 ஆயிரத்து 829 கன அடி நீர் திறக்கப்பட்டுள்ளது. நீர்வரத்தால் கரூர் மாயனூர் கதவணை கடல் போல் காட்சியளித்தது.
மாயனூர் கதவணை முழு கொள்ளளவை எட்டியுள்ளதால் கரூர், திருச்சி, தஞ்சை மாவட்டங்களுக்கு குடிநீர் மற்றும் விவசாய பணிகளுக்கு தண்ணீர் பற்றக்குறை இருக்காது என விவசாயிகள் மகிழ்ச்சி தெரிவித்துள்ளனர்.
