நாடு முழுவதும் விநாயகர் சதுர்த்தி விழா கோலாகலமாக கொண்டாடப்பட்டு வரும் நிலையில் தமிழகத்தின் பல்வேறு பகுதிகளில் சிறப்பு வழிபாடு நடைபெற்றது.
புதுக்கோட்டையில் இந்து முன்னணி சார்பில் பல்வேறு இடங்களில் விநாயகர் சிலைகள் பிரதிஷ்டை செய்யப்பட்டுள்ளது. மாவட்ட தலைவர் கற்பக வடிவேல் தலைமையில் பிரதிஷ்டை செய்யப்பட்ட சிலைகளுக்கு சிறப்பு யாகங்கள் வளர்க்கப்பட்டு சுவாமிக்கு தீபாரதணை காட்டப்பட்டது. இந்த நிகழ்ச்சியில் ஏராளமானோர் பங்கேற்று சுவாமி தரிசனம் செய்தனர்.
திண்டுக்கல்லில் உள்ள மகா சங்கடஹர சதுர்த்தி விநாயகர் திருக்கோயிலில் சிறப்புப் பூஜைகள் நடைபெற்றது. இக்கோயிலில் உள்ள 32 அடி உயர விநாயகரின் முன்பு நந்தவன விநாயகர், புல்லட் ஓட்டும் விநாயகர், சிம்ம விநாயகர் உள்ளிட்ட 108 விநாயகர் சிலைகள் காட்சிப்படுத்தப்பட்டன.
சேலத்தில் உள்ள ராஜகணபதி ஆலயத்தில் அதிகாலை நடைதிறக்கப்பட்டு சிறப்புப் பூஜைகள் நடத்தப்பட்டது. ஏராளமான பக்தர்கள் அருகம்புல். எருக்கம்பூ உள்ளிட்டவை கொண்டு வந்து சுவாமிக்கு படைத்தனர். தங்க கவசத்தில் ஜொலித்த விநாயகரை ஏராளமான பக்தர்கள் வழிபட்டனர்.
திண்டுக்கல் மாவட்டம், என் பாறைப்பட்டியில் விநாயகர் சதுர்த்தி விழா கோலாகலமாக கொண்டாடப்பட்டது. இப்பகுதியில் ஊர் பொதுமக்களால் பிரதிஷ்டை செய்யப்பட்ட விநாயகர் சிலைக்கு கடலை பொரி படைத்து அபிஷேகம் நடத்தப்பட்டது. அப்போது, ஏராளமான பக்தர்கள் தேவராட்டம் ஆடியும் சாமி தரிசனம் செய்தனர்.
நெல்லை மாவட்டம், மணிமூர்த்தீஸ்வரத்தில் அமைந்துள்ள உச்சிஷ்ட விநாயகர் ஆலயத்தில் மூலவருக்கு இளநீர், வீபூதி உள்ளிட்ட 16 வகையான பொருட்களால் அபிஷேகம் நடைபெற்றது. இதையடுத்து விநாயகருக்கு தங்க கவச அலங்காரம் செய்யப்பட்டது. இதில், திராளான பக்தர்கள் கலந்துகொண்டு வழிபட்டனர்.
