ஆன்மீக விழிப்புணர்வு மூலம் சமூகத்தில் நிலவும் தீமைகளைக் களைய முடியும் என்பதை உணர்ந்தவர் வள்ளலார் என தமிழக பாஜக மாநில தலைவர் அண்ணாமலை புகழாரம் சூட்டியுள்ளார்.
இதுதொடர்பாக அவர் விடுத்துள்ள வாழ்த்து செய்தியில், அன்பையே தெய்வ வடிவாகக் கண்டு, அனைத்து உயிர்களிடமும் அன்பு செலுத்துவதன் மூலம் இறைவனை அடையலாம் என, ஜீவகாருண்யத்தையும், ஆன்மீகத்தையும் ஊட்டிவளர்த்த சிறந்த முருக பக்தரான வள்ளலார் பெருமான் அவதார தினம் இன்று.
பிறப்பினால் ஏற்படும் ஜாதி சமூக வேறுபாடுகள் அர்த்தமற்றவை என்று குறிப்பிட்டதோடு ஆன்மீக விழிப்புணர்வு வாயிலாக, சமூகத்தில் நிலவும் தீமைகளைக் களையமுடியும் என்பதை உணர்ந்தவர்.
பசித்தவர்களுக்குச் சாதி, மதம், இனம், மொழி வேறுபாடு கருதாது உணவளிப்பதற்காக அவர் உருவாக்கிய வடலூர் சத்திய ஞான சபை, இன்றும் தினமும் லட்சக்கணக்கான மக்களின் பசியாற்றி வருகிறது.
சமூகத்தில் அன்பு மற்றும் சகோதரத்துவம் நிலவ வேண்டும் என்ற நோக்கத்திற்காகவே வாழ்ந்த திருவருட்பிரகாச வள்ளலார் பெருமானைப் போற்றி வணங்குவோம். அருட்பெருஞ்ஜோதி தனிப்பெரும் கருணை என அண்ணாமலை தெரிவித்துள்ளார்.
